Аморим МЮдан қанча миқдорда товон пули олиши маълум бўлди

“Манчестер Юнайтед” бош мураббийи лавозимини тарк этган Рубен Аморим меҳнат шартномаси муддатидан олдин бекор қилингани учун 10,05 миллион фунт стерлинг миқдорида товон пули олади. Бу ҳақда “talkSPORT” нашри хабар берди.

Португалиялик мутахассис “қизил иблислар” сафида 2024 йил ноябридан буён ишлаб келган ва 2026 йил январь ойида жамоани тарк этган. Унинг шартномаси кейинги мавсум охиригача мўлжалланган эди. Келишув шартларига кўра, Аморимга 10,05 миллион фунт стерлинг тўланади.

2024 йил ноябрь ойида “Манчестер Юнайтед” Аморимни жамоага олиб келиш учун унинг аввалги клуби “Спортинг”га 9,6 миллион фунт стерлинг миқдорида компенсация тўлаган эди. Шартномага биноан, мураббийнинг йиллик маоши 6,7 миллион фунт стерлингни ташкил этган.

Манбага кўра, Аморим “Манчестер Юнайтед”даги фаолияти давомида 7,8 миллион фунт стерлинг ишлаб топган. Шунингдек, унинг бошқаруви остида клуб трансферлар учун тахминан 250 миллион фунт стерлинг сарфлаган.

Маълумот учун, айни пайтда “Манчестер Юнайтед” Англия Премьер-лигаси турнир жадвалида 31 очко билан 6-ўринни эгаллаб турибди.

Эслатиб ўтамиз, кеча, 5 январь куни “Манчестер Юнайтед” раҳбарияти Рубен Аморимни асосий жамоа бош мураббийи лавозимидан озод этишини маълум қилган эди.