Алиевнинг қўриқчилари АҚШда озарбайжонлик намойишчиларни дўппослади (видео)

Кеча, 19 февраль куни “Тинчлик кенгаши” йиғилишида иштирок этиш учун Америка Қўшма Штатлари пойтахти Вашингтонга борган Озарбайжон Президенти Илҳом Алиев тунаган меҳмонхона қаршисида сиёсий муҳожирлар томонидан намойиш ўтказилди. Бироқ, намойишчилар бу сафар шунчаки эътиборсизликка эмас, балки Алиевнинг қўриқчилари томонидан кучли қаршилик ва зўравонликка учради. 

Норозилик акцияси иштирокчиларидан камида 2-3 нафари Президент Илҳом Алиевнинг қўриқчилари деб айтилаётган шахслар – қуролланган, басавлат, расмий кийинган эркаклар томонидан дўппослангани акс этган видео ижтимоий тармоқда яшин тезлигида тарқалмоқда. Буни тармоқ фойдаланувчилари 2017 йилда айнан Вашингтонда Туркия Президенти Ражаб Тойиб Эрдўғаннинг ташрифи муносабати билан намойишга чиққанларнинг дўппослангани билан солиштирмоқда. 

Илҳом Алиев АҚШ Президенти Доналдь Трампнинг таклифига биноан расмий ташриф билан ушбу давлатда бўлиб, Вашингтонда ўтказилган “Тинчлик кенгаши”нинг биринчи йиғилишида иштирок этди. Алиев жойлашган меҳмонхонаси қаршисида Америкада яшаётган озарбайжонлик мухолифатчилар томонидан намойиш ўтказилди. Улар Озарбайжонда сақланаётган сиёсий маҳбусларга, хусусан, Озарбайжон Халқ фронти партияси раиси Али Каримлига озодлик берилишини талаб қилиб, норозилик билдирган.  

Шунингдек, улар қўлларида овоз кучайтиргич билан бир неча маротаба “Сиёсий маҳбусларга озодлик”, “Диктатор” деб бақирган. Шундан сўнг уларга нисбатан Президент қўриқлов хизмати тарафидан куч ишлатилиб, жароҳат етказилган.

“Мақсадимиз – Илҳом Алиев жойлашган меҳмонхона қаршисида сиёсий маҳбусларга озодлик сўраб, тинч намойиш ўтказиш эди. Бизнинг ҳеч қандай провакация қилиш ниятимиз йўқ. Биз Озарбайжон Халқ фронти партияси раиси Али Каримлига озодлик берилишини сўрадик. Илҳом Алиевга Озарбайжонда эътироз қилишнинг иложи йўқ. Биз эса ҳеч бўлмаса хорижда овозимизни эшиттиришни хоҳладик. Илҳом Алиевнинг қўриқчилари эса бунга қаттиқ жавоб қайтарди. Улар бизга зарар бердилар, менинг кийимимни йиртишди, мени дўппослашди”, деган намойиш иштирокчиларидан бири.

Намойишни бостиришда Президент Қўриқлаш хизмати билан бирга АҚШ полицияси ҳам иштирок этган.

Эслатиб ўтамиз, аввалроқ  Германиянинг Мюнхен шаҳрида 2026 йилги хавфсизлик конференциясига борган Илҳом Алиев бошчилигидаги делегация, хусусан, мамлакат биринчи хоними – вице-президент Меҳрибон Алиева журналист ва инсон ҳуқуқлари фаоли Эмин Ҳусайновнинг мамлакатда демократиянинг ҳолати билан боғлиқ саволига берган шармандали жавоби билан тилга тушганди.