Алиев ЕОИИ билан ҳамкорлик учун шарт қўйди

Олам

image

Озарбайжон Арманистон билан тинчлик шартномасини имзолаганидан кейин Евроосиё иқтисодий иттифоқи (ЕОИИ) билан тўлиқ ҳамкорлик қила олади. Бу ҳақда Озарбайжон Президенти Илҳом Алиев “Москва. Кремль. Путин" дастурига берган интервьюсида айтиб ўтди.

“Арманистонни ҳисобга олмаганда, ЕОИИга аъзо давлатлар билан узоқ йиллик муносабатларимиз бор, лекин умид қиламанки, биз Арманистон билан ҳам тинчлик шартномасини имзолай оламиз. Шундай қилиб, биз ЕОИИ билан тўлиқ ҳамкорлик қиламиз. Бу ерда ҳамма менга таниш, чунки биз ҳамкасблар билан узоқ вақтдан бери ҳам икки томонлама, ҳам кўп томонлама форматда ишлаяпмиз”, деган Алиев журналист Павел Зарубиннинг саволларига жавоб бериб.

Озарбайжон Президенти қўшимча қилдики, Олий Евроосиё иқтисодий кенгаши аъзолари йиғилишининг расмий қисмидан сўнг ўзи иштирок этган кенгайтирилган йиғилишда томонлар ҳамкорлик истиқболлари, яқинлашув бўйича фикр алмашган. 

“Албатта, бу ерда барча ижобий ва салбий томонларини кўриб чиқиш керак. Биз прагматизмдан чиқишимиз зарур. Биз сиёсатимизда ҳамиша шундан келиб чиқамиз", деган Алиев.

Эслатиб ўтамиз, 25 май куни Москвадаги Катта Кремль саройида бўлиб ўтган Олий Евроосиё иқтисодий кенгашининг кенгайтирилган таркибдаги мажлисида Россия Президенти Владимир Путин, Арманистон Бош вазири Никол Пашинян, Беларусь фуқароси Александр Лукашенко, Қозоғистон Президенти Қосим-Жомарт Тўқаев, Қирғизистон Президенти Садир Жапаров ва Евроосиё иқтисодий комиссияси ҳайъати раиси Михаил Мясникович иштирок этганди. Шунингдек, Ўзбекистон Президенти Шавкат Мирзиёев видеоалоқа орқали қатнашди. Озарбайжон Президент Илҳом Алиев ва Тожикистон раҳбари Имомали Раҳмон мазкур йиғилишга меҳмон сифатида таклиф қилинди. 

Тадбирда сўзлаган Арманистон Бош вазири Никол Пашинян Арманистон ва Озарбайжоннинг ҳудудий яхлитликни ўзаро тан олиш бўйича келишуви ҳақида гапирди. Шу куни Кремлда Россия Президенти Владимир Путин, Озарбайжон раҳбари Илҳом Алиев ва Арманистон Бош вазири Никол Пашинян ўртасидаги уч томонлама музокаралар бўлиб ўтди. 26 майда эса Озарбайжоннинг Франциядаги элчиси Лейла Абдуллаева Баку ва Ереван келаси ҳафта тинчлик битимини тузиши мумкинлигини айтди.


Мақола муаллифи

Теглар

Озарбайжон Илҳом Алиев Арманистон ЕОИИ

Баҳолаганлар

0

Рейтинг

3

Мақолага баҳо беринг

Дўстларингиз билан улашинг