АҚШнинг жанговар вертолёти Ҳормуз бўғозида қулаб тушди

АҚШ армиясининг AH-64 Apache жанговар вертолёти Ҳормуз бўғози ҳудудида ҳалокатга учради. Бу ҳақда “The New York Times” нашри хабар берди.

Манбалардан бирининг айтишича, вертолёт Эрон кучлари томонидан уриб туширилганми ёки техник носозлик сабаб қулаганми, ҳозирча аниқ эмас. Ҳодиса юзасидан тергов олиб борилмоқда. Экипаж аъзолари эса омон қолган.

AH-64 Apache АҚШ ва НАТО давлатларининг асосий зарба берувчи вертолётларидан бири ҳисобланади. У зирҳли техникаларни йўқ қилиш, ҳаво ҳужумидан мудофаа тизимларини бостириш ҳамда қуруқликдаги қўшинларни қўллаб-қувватлаш учун мўлжалланган. Вертолёт 30 миллиметрли автоматик тўп, юқори аниқликдаги ракеталар ва кучли зирҳ билан жиҳозланган.

Нашр маълумотларига кўра, Apache вертолётлари, MQ-9 Reaper дронлари ҳамда F/A-18 ва F-35 қирувчи самолётлари АҚШнинг Эроннинг Ҳормуз бўғозини ёпиб қўйишига йўл қўймасликка қаратилган ҳарбий амалиётларида фаол қўлланмоқда.

Нашрнинг ёзишича, ҳалокат 8 июнь куни содир бўлган ва бу можаро бошланганидан буён АҚШнинг илк йўқотилган Apache вертолёти ҳисобланади.

Аввалроқ АҚШ президенти Дональд Трамп Эрон билан келишувга яқин икки ҳафта ичида эришилиши мумкинлигини айтган эди. Унинг таъкидлашича, Вашингтон можаро бўйича “тўлиқ ғалаба”ни эълон қилишни кутмоқда.

АҚШ Конгресси тадқиқот хизмати май ойида эълон қилган ҳисоботда Эрон билан боғлиқ ҳарбий амалиётлар давомида АҚШ жами 42 та ҳарбий учиш аппарати — самолётлар, вертолётлар ва дронларни йўқотгани маълум қилинган эди.

Пентагон эса апрель ойи охирида Эрон билан боғлиқ ҳарбий операциялар учун 25 миллиард доллар сарфланганини, маблағнинг катта қисми ўқ-дорилар харидига йўналтирилганини билдирган.