АҚШнинг Шарқий Европадаги қўшинлари қисқартирилади

АҚШ НАТОнинг шарқий қанотида жойлашган ҳарбий контингентини қисқартиришни режалаштирмоқда. Америкалик ҳарбийларнинг бир қисми Шарқий Европа мамлакатларидан олиб чиқилади. Бу ҳақда Руминия Мудофаа вазирлиги Қўшма Штатларнинг Европадаги қўшинлар сонини камайтириш ҳақидаги қарорини эълон қилган пресс-релиз чиқарди.

Унда Руминия ва иттифоқчилар бу қарордан хабардор қилинганлиги айтилади. Маълум қилинишича, бу АҚШ қуролли кучларининг глобал жойлашуви бўйича қайта баҳолаш жараёни доирасида амалга оширилмоқда.

“Бу қарор кутилган эди, чунки Руминия ўзининг стратегик ҳамкори АҚШ билан доимий алоқада бўлиб келмоқда. Қўшинлар сонининг қисқариши февраль ойида эълон қилинган Президент маъмуриятининг янги устувор йўналишлари билан боғлиқ. Қарор қабул қилишда НАТОнинг шарқий қанотдаги иштироки ва фаолияти кучайгани ҳам инобатга олинди, бу эса АҚШга минтақадаги ҳарбий позициясини қайта кўриб чиқиш имконини беради”, дейилади Руминия Мудофаа вазирлиги баёнотида.

Вазирлик маълумотига кўра, АҚШ қарори Европада бир неча НАТО мамлакатларида жойлашган бригада ротациясини тўхтатишни назарда тутади. Шу билан бирга, Руминия ҳудудида қарийб минг нафар америкалик ҳарбий хизматчи қолади.

"Deutsche Welle" нашрининг НАТО вакилларига таяниб ёзишича, альянс бу қарорни одатдаги жараён сифатида баҳолаган ва потенциал тажовузкорларни тийиб туриш учун зарур кучлар сақланиб қолаётганини маълум қилган.

“24 канал” хабарига кўра, АҚШ контингенти Болгария, Словакия ва Венгрияда ҳам қисқартирилади.

Эслатиб ўтамиз, аввалроқ АҚШ Президенти Дональд Трамп Вашингтонда польшалик мавқедоши Кароль Навроцкий билан учрашувда АҚШ ўз қўшинларини Польшадан олиб чиқиб кетиш ниятида эмаслигини айтган эди.