АҚШнинг Россияга қарши санкциялари аллақачон тайёр – Трампнинг одами

АҚШ Президенти Дональд Трампнинг Украина бўйича махсус вакили Кит Келлогг Россияга қарши янги санкциялар пакети аллақачон тайёрланганини маълум қилди. Бу ҳақда у кеча, 3 июнь куни “Fox News” телеканалига берган интервьюсида сўз очди.

Унга кўра, ушбу ташаббус устида сенатор Линдси Грэм (Жанубий Каролина штати, республикачи) ва сенатор Ричард Блументал (Коннектикут штати, демократ) ишлаган.

Келлоггнинг айтишича, янги ҳужжат “2025 йилги Россияга қарши санкциялар тўғрисидаги қонун” деб номланади ва “жуда оғир чораларни” ўз ичига олади. Хусусан, Россия нефти, гази, урани ва бошқа маҳсулотларини харид қилаётган давлатлардан олиб кириладиган товарларга 500 фоизгача бўлган бож ставкаларини жорий этиш кўзда тутилган.

Украина Президенти Владимир Зеленский АҚШ Президенти Дональд Трампни ушбу санкциялар пакетини қўллаб-қувватлашга чақирган.

Шу билан бирга, Украина Президенти девони раҳбари Андрей Ермак ҳам санкцияларни кучайтиришга чақирган. Ушбу санкциялар пакети Конгресс томонидан маъқуллангач, уни АҚШ Президенти Дональд Трамп расман имзолаши керак бўлади.

Эслатиб ўтамиз, аввалроқ АҚШ Президенти Дональд Трамп маъмурияти Россияга қарши янги “совға” сифатида санкциялар пакетини тайёрлагани ҳақида хабар берилганди. Ушбу чоралар банк соҳаси ва энергетика секторига нисбатан чекловларни ўз ичига олади. Санкциялар фақат Президент Дональд Трамп тегишли фармойиш берган тақдирда кучга киради. Аммо Трамп жорий йилнинг 19 май куни россиялик мавқедоши Владимир Путин билан телефон орқали суҳбатдан сўнг Россияга қарши янги санкциялар жорий қилмаслигини маълум қилганди. Буни у Украинадаги урушни тугатиш масаласида ҳали олдинга силжиш имконияти мавжудлиги билан изоҳлаган.