АҚШнинг 13 та штатида фавқулодда ҳолат эълон қилинди

АҚШ Энергетика вазирлиги 13 та штат ва Колумбия округини қамраб олувчи энергетика тизимида фавқулодда ҳолат режимини эълон қилди. Бу ҳақда идора раҳбари Крис Райт томонидан жорий йилнинг 11 октябрь куни имзоланган фармонда айтилади.

Қайд этилишича, фавқулодда ҳолат электр энергиясига бўлган талабнинг кескин ортиши, шунингдек, уни ишлаб чиқариш ва узатиш учун генерация ва қувватларнинг етишмаслиги билан боғлиқ. Вазирлик PJM Interconnection энергетика тизими операторига электр таъминоти ишончлилигини сақлаб қолиш учун муайян энергоблокларни ёқишни ва зарурат туғилганда захира қувватларини ишга солишни топширган.

Фармойиш Виржиния, Делавэр, Ғарбий Виржиния, Иллинойс, Индиана, Кентукки, Мэриленд, Мичиган, Нью-Жерси, Огайо, Пенсильвания, Шимолий Каролина, Теннесси штатлари ва Колумбия округига тааллуқли. Чора-тадбирлар 13 октябрдан 16 октябргача амал қилади.

PJM Interconnection – АҚШнинг энг йирик минтақавий энергетика тизими бўлиб, 13 та штат ва Колумбия округи ҳудудида электр энергиясини ишлаб чиқариш ва узатишни мувофиқлаштиради. У мамлакат шарқининг салмоқли қисмини электр энергияси билан таъминлайди.

Эслатиб ўтамиз, аввалроқ ҳам АҚШ Президенти Дональд Трамп мамлакат энергетика тизимига солинаётган таҳдидлар муносабати билан фавқулодда ҳолат жорий этиш тўғрисидаги фармонни имзолаган эди.