АҚШни қўллаб-қувватлаган ҳар қандай давлат нишонимизга айланади – Эрон (видео)

АҚШни қўллаб-қувватлаган ҳар қандай давлат Эроннинг нишонига айланади. Бу ҳақда кеча, 25 июль куни Ислом инқилоби қўриқчилари корпуси (ИИҚК) генерали ва ташкилотнинг расмий вакили Ҳусейн Моҳеби огоҳлантирувчи баёнот билан чиқди.

Баёнотга кўра, Эрон ҳудудига зарба беришда АҚШга ёрдам берган ҳар қандай мамлакат Эрон ракеталари учун қонуний нишонга айланади. Бу айниқса Буюк Британияга тегишли бўлиб, ИИҚК Эрон ракеталари Британия оролларигача етиб бориши мумкинлигини алоҳида урғулаган. Шу сабабли, Лондон ўз ҳарбий базаларини Америка самолётлари учун очмагани маъқул. Шунингдек, Форс кўрфази монархияларига алоҳида огоҳлантириш берилган. 

“Ҳар қандай давлат – Буюк Британия, Форс кўрфази мамлакатлари ёки бошқалар, агар урушда АҚШни қўллаб-қувватласа, улар бизнинг қонуний нишонларимизга айланади.

Яқинда АҚШнинг B-1 самолётлари Буюк Британиядаги авиабазалардан фойдаланди. Агар улар ҳамкорлик қилса, улар биз учун аниқ ва қонуний нишон бўлади. Ҳар бир вазият учун бизда аниқ сценарий мавжуд. Бу сценарийлар албатта бир хил эмас, турлича бўлиши мумкин. Бизнинг, масалан, Қувайтдаги АҚШ базасига берадиган зарбамиз Британияга, Британиядаги АҚШ базасига ёки ҳатто АҚШ билан ҳамкорлик қилгани учун Британиянинг ўзига берадиган зарбамиздан фарқ қилиши мумкин. Аммо уларнинг қонуний нишонимиз эканига ҳеч қандай шубҳа йўқ.”, деган ИИҚК вакили.

Моҳеби ўз баёнотида Британияга алоҳида урғу берган.

“Британия сиёсий ва ҳарбий позицияларида ҳар доим АҚШга тобе бўлиб келган. Британиядан мантиқан ўз чегарасини АҚШдан ажратиши кутилмаган эди. Британия ўз иродасини бутунлай АҚШ иродасига бўйсундирган. Ҳозир, охирги пайтларда Европа ва АҚШ ўртасидаги баъзи масалалар сабабли бироз масофа сақлаган бўлишса-да, бу уларнинг ўтмишини ва мамлакатларининг АҚШ қарорларига нисбатан мустақил эмаслигини ювиб юбормайди. Одатда Британия АҚШга эргашган. Ҳозирги охирги икки-учта ҳолатни айтмаганда, агар глобал қарорларнинг барчасига назар ташласангиз урушларда АҚШ ёнида бўлган”, дейди у.

Ўтган ҳафта АҚШ Президенти Дональд Трамп дам олиш кунларида америкалик ҳарбийлар ҳалок бўлганидан кейин Эрондан қасос олишга ваъда берган. Сўнгги бир ҳафта ичида Трамп Эронда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш билан таҳдид қилиб келди. 

Маълумот ўрнида, 1949 йилги Женева конвенциялари уруш пайтида аҳолининг ҳаёти учун муҳим ҳисобланган фуқаролик объектларига ҳужум қилишни тақиқлайди. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги аввалги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.

Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган ҳужумлари оқибатида минглаб одамлар ҳалок бўлган ва миллионлаб киши ўз уйини тарк этишга мажбур бўлди. Можаро нефть нархларининг ошишига ва жаҳон молия бозорларида беқарорликка сабаб бўлди.

Эслатиб ўтамиз, аввалроқ АҚШ ҳарбийлари Эронга қарши навбатдаги зарбаларни амалга ошириб, шу тариқа кетма-кет 13-кеча давом этган ҳужумларни давом эттиргани ҳақида хабар берилган эди.