13-кеча: АҚШ Эронни бомбардимон қилишда давом этмоқда

АҚШ ҳарбийлари кеча, 23 июль оқшомида Эронга қарши навбатдаги зарбаларни амалга ошириб, шу тариқа кетма-кет 13-кеча давом этган ҳужумларни якунлади. Бу ҳақда бугун, 24 июль куни АҚШ Марказий қўмондонлиги (CENTCOM) маълум қилди.

Марказий қўмондонликнинг маълумотига кўра, сўнгги ҳужумлар икки соатдан ортиқ давом этган.

“CENTCOM Эроннинг ҳарбий қўмондонлик марказлари, дронлар сақлаш иншоотлари, алоқа тармоқлари, соҳил кузатув нуқталари ва денгиздаги ҳарбий имкониятларига зарба берди. Бу Эроннинг Ҳормуз бўғози орқали ҳаракатланаётган фуқаролик денгизчилари ва тижорат кемалари учун туғдираётган хавфини янада камайтиришга қаратилган”, дейилади қўмондонлик баёнотида.

АҚШ Президенти Дональд Трамп 23 июль куни Ямандаги ҳусийлар Қизил денгизда икки Саудия Арабистони нефть танкерига ҳужум қилганидан сўнг Эрон ва унинг ҳусий иттифоқчиларига қарши “кескин ҳарбий жазо” қўлланилишини ваъда қилди. Теҳрон эса Ҳормуз бўғозини тўсиб қўйган.

Бу ҳужумлар урушнинг дунёдаги муҳим денгиз савдо йўлларидан яна бирига ҳам ёйилганини англатади. 

Эрон Соғлиқни сақлаш вазирлиги вакилининг маълум қилишича, АҚШнинг сўнгги зарбалари оқибатида 50 нафар тинч аҳоли ҳалок бўлган, 500 киши яраланган. Сўнгги кунларда урушда ҳалок бўлган АҚШ ҳарбийлари сони эса 18 нафарга етган. 

Шунингдек, Трамп кеча, 22 июль куни Эрон Ҳормуз бўғозидаги кемаларга ҳар сафар ўқ узганида, АҚШ Эрондаги биттадан кўприк ёки электр станциясини йўқ қилишини айтди.

Эрон Қуролли кучларининг қўшма қўмондонлиги эса давлат ОАВ орқали тарқатилган баёнотда, агар бу таҳдид амалга оширилса, Эрон минтақадаги нефть, газ, электр энергетикаси ва бошқа иқтисодий инфратузилма объектларига зарба беришини огоҳлантирди.

Ўтган ҳафта АҚШ Президенти Дональд Трамп дам олиш кунларида америкалик ҳарбийлар ҳалок бўлганидан кейин Эрондан қасос олишга ваъда берган. Сўнгги бир ҳафта ичида Трамп Эронда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш билан таҳдид қилиб келди. 

Маълумот ўрнида, 1949 йилги Женева конвенциялари уруш пайтида аҳолининг ҳаёти учун муҳим ҳисобланган фуқаролик объектларига ҳужум қилишни тақиқлайди. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги аввалги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.

Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган ҳужумлари оқибатида минглаб одамлар ҳалок бўлган ва миллионлаб киши ўз уйини тарк этишга мажбур бўлди. Можаро нефть нархларининг ошишига ва жаҳон молия бозорларида беқарорликка сабаб бўлди.

Эслатиб ўтамиз, аввалроқ АҚШ ҳарбийлари Президент Дональд Трамп кўрсатмаси билан Эронга қарши навбатдаги зарбаларни амалга ошириб, шу тариқа кетма-кет 12-кеча давом этган ҳужумларни якунлаганди.