АҚШдан ихтиёрий чиқиб кетган ноқонуний муҳожирларга 1000 доллар берилади

АҚШ Ички хавфсизлик департаменти ноқонуний муҳожирларни мамлакатдан чиқиб кетишга ундаш мақсадида уларга 1000 доллар миқдорида тўлов таклиф қилмоқда. Бу ҳақда департаментнинг расмий сайтида эълон қилинган баёнотда сўз боради.

Баёнотда айтилишича, бу ташаббус ноқонуний муҳожирлар учун ўз ихтиёри билан ватанга қайтиш жараёнини енгиллаштиришга қаратилган. АҚШ Ички хавфсизлик вазири Кристи Ноэм бу бўйича қуйидагича изоҳ берди:

“Агар сиз бу ерда ноқонуний равишда бўлсангиз, ўз ихтиёрингиз билан депортация бўлиш – қўлга олинмаслик учун энг яхши, хавфсиз ва тежамкор йўлдир”, дейди у.

Шунингдек, вазир CBP Home мобил иловасини юклаб олиб, шу орқали мустақил депортация жараёнини бошлашга чақирган.

Дастурга кўра, ушбу илова орқали чиқиб кетган ҳар бир ноқонуний муҳожир ватанига қайтганидан сўнг 1000 доллар маблағ олади. Бундан ташқари, сафар харажатлари ҳам қоплаб берилиши айтилмоқда.

“Бу чора бизнинг ҳуқуқни муҳофаза қилувчи органлар, чет элликлар ва солиқ тўловчилар учун энг хавфсиз ва иқтисодий жиҳатдан энг мақбул йўлдир. Бу орқали 70 фоизгача бюджет тежалади”, дея изоҳ берган департамент мазкур дастурга.

Қайд этиш жоиз, мамлакат Президенти Дональд Трамп ўз сайлов кампаниясидаёқ ноқонуний миграцияга қарши қатъий сиёсат юритишини ваъда қилган эди. Ички хавфсизлик департаментининг ҳисоб-китобларига кўра, 2025 йил бошидан бери 117 минг муҳожир депортация қилинган. “The Washington Post” маълумотига кўра, йил якунигача бу кўрсаткич 1 миллион кишига етиши мумкин.

Эслатиб ўтамиз, аввалроқ Ўзбекистон ўз ҳисобидан АҚШдан депортация қилинган 100 дан ортиқ кишини махсус чартер рейс билан Тошкентга олиб келган эди. Улар орасида Қозоғистон ва Қирғизистон фуқаролари ҳам бўлган. Кейинроқ эса АҚШ ҳукумати Ўзбекистоннинг мазкур амалиётини эътироф этиб, миннатдорлик билдирди.