АҚШдаги мусобақада ўзбекистонлик ҳарбийлар рекорд ўрнатди

Жамият 22533
image

Ўзбекистон Мудофаа вазирлиги ҳарбий хизматчилари кичик сержантлар Абдурасул Туйғунов ва Абдумалик Абдураҳмонов жорий йилнинг 17-24 март кунлари АҚШнинг Миссисипи штати, Camp Shelby ҳарбий ўқув базасида бўлиб ўтган “Энг илғор жангчи-2022” мусобақасида иштирок этди. Бу ҳақда вазирлик Матбуот хизмати хабар қилди.

Қайд этилишича, мусобақада ўзбекистонлик ҳарбий хизматчилар АҚШ Миллий гвардиясининг Махсус бўлинмалари ҳарбий хизматчилари билан куч синашган. 

Мусобақа давомида ҳарбий хизматчилар якка таркибда жисмоний тайёргарлик синовлари (6 та машқни ўз ичига олган Фитнес тест), жисмоний ва руҳий зўриқиш йўлагидан ўтиш, тунда 15 километр масофага мўлжал олиш, 15 кило юк билан 20 километр масофага марш югуриш, жанговар ва умумий тайёргарлик бўйича тест синовлари, иншо ёзиш (ҳарбий ҳамкорлик мавзусида 500 тадан кам бўлмаган сўз), артиллерия оловини бошқариш, АҚШ намунасидаги ўқотар қуролларни нотўлиқ қисмларга ёйиш, йиғиш ва жанговар ҳолатга келтириш, шунингдек, улардан турли усул ва шароитларда ўқ отиш, кутилмаган (сюрприз) машқлар каби шартларни муваффақиятли бажарган. 

Ҳарбий хизматчилар мусобақа давомида 10 та йўналиш бўйича 20 дан ортиқ шартларни ўзида жамлаган синовлардан муваффақиятли ўтиб, 3 маротаба рекорд натижа қайд этган. 

Мазкур мусобақада ўзбекистонлик ҳарбий хизматчилар 2019 ва 2021-йилларда ҳам муваффақиятли иштирок этиб, ғолиб бўлишган эди.

Диёра Абдураҳмoнова
Мақолага баҳо беринг
Баҳолаганлар: 1387
Рейтинг: 3.1
t
×