АҚШда Янги йил кечасида теракт уюштиришни режалаштирганлар ҳибсга олинди

АҚШнинг Калифорния штатидаги Лос-Анжелес шаҳрида экстремал чап радикал гуруҳнинг тўрт аъзоси ҳибсга олинди. Бу ҳақда “Fox News” хабар берди. 

Қайд этилишича, Адлия вазирлиги ва Федерал тергов бюросининг биргаликдаги фаол олиб борган тадбирлари натижасида Лос-Анжелесда бўлғуси террорнинг олди олинган. Вазирнинг сўзларига кўра, чап радикал гуруҳ аъзолари янги йил кечасида бир нечта портлашлар уюштиришни режалаштирган. 

АҚШ Адлия вазири Памела Бонди, шунингдек, гуруҳнинг эҳтимолий мақсадлари орасида АҚШ Иммиграция ва божхона хизматлари (ICE) агентлари ҳам бўлиши мумкинлигини билдирган.

“Биз бундай террорчи гуруҳларни аниқлаш ва уларни жавобгарликка тортишни давом эттирамиз,” дейди Бонди. 

Лос-Анжелес прокуратурасининг вакили Билл Эссайлининг айтишича, ҳибсга олинган тўрт киши 19 декабрь куни Сан-Бернардино чўл ҳудудида портловчи қурилмаларни синовдан ўтказишни мақсад қилган. 

Гумондорлар янги йил кечасида бир нечта АҚШ компанияларини портлатиш бўйича “батафсил ва мувофиқлаштирилган режани” ишлаб чиққан ва қурилмаларни ярим тунда ишга туширишни режалаштирган. У аниқ компанияларни номламаган, аммо “Amazon каби логистика маркази” назарда тутилгани таъкидланган. 

Матбуот анжуманида Эссайли разведка самолёти ёрдамида олинган видеони намойиш қилган. Унда гумондорлар чўлда тўпланиб, портловчи қурилмаларни синовдан ўтказаётгани кўринади.

Эслатиб ўтамиз, аввалроқ Россияда теракт уюштирмоқчи бўлган гуруҳ қўлга олинганди.