АҚШда одамлар яна бош кўтарди (фоторепортаж)

АҚШда ирқчилик ва полиция зўравонлигига қарши намойишлар яна авж олган. Нью-Йоркнинг Таймс майдонида йиғилган намойишчилар АҚШ Президенти Дональд Трамп ва вице-президент Майк Пенсга қарши чиқмоқда. 

Таъкидланишича, норозилик ҳаракатида 1500 га яқин иштирокчилар қатнашган. Намойишчилар ҳуқуқни муҳофаза қилиш органлари ходимларига шиша, тош ва кичик портловчи мосламаларни улоқтирганлар. 

Намойишчилар тарқалишдан бош тортди. Полиция эса кўздан ёш оқизувчи газ ва кўз ачиштирувчи газлардан фойдаланишга мажбур бўлди.

Жорий ҳафтада ижтимоий тармоқларда қора танли Дэниел Пруд иштирокидаги видео тарқалди. У кўчага яланғоч чиқади ва ўзининг коронавирус бўлганини айтиб бақиради. Шу вақт уни полиция қўлга олиб, бошига қоп кийдиради ва ерга ётқизиб, оёғи билан бўйнидан босади. Пруд ҳаво етишмовчилигидан вафот этади. 

Бу орада ушбу ҳолат акс этган видео тарқалди. Қоратанли Пруднинг вафотидан сўнг, воқеа иштирокчиси бўлган 7 нафар полициячи вақтинча ишдан четлатилди. Айни вақтда ҳолат бўйича тергов жараёнлари кетмоқда. 

Шуни таъкидлаб ўтиш ўринлики, ирқчилик билан боғлиқ муаммо АҚШда кеча ё бугун пайдо бўлгани йўқ. Дунё харитасида Америка номи пайдо бўлибдики, ирқчилик мамлакат халқлари орасидаги асосий муаммога, баъзан эрмак мавзуга айланиб қолган. 

Эслатиб ўтамиз, жорий йилнинг 25 май куни Миннеаполис полицияси афроамерикалик Жорж Флойдни ҳибсга олди. Қўлга олиш пайтида полициячи эркакнинг бўйнини тиззаси билан босиб туради. Флойд “мен бўғиляпман”, деб бир неча марта айтган. Аммо ҳуқуқ-тартибот идоралари ходимлари бунга эътибор бермаган. Оқибатда, эркак реанимацияда вафот этган. Бу АҚШда оммавий норозилик ва тартибсизликларни келтириб чиқарди.