АҚШда кучли бўрон оқибатида ҳалок бўлганлар сони 30 нафарга етди

Аввалроқ, АҚШда қор ёғиши ва совуқ билан бирга келган бўрон оқибатида камида етти киши ҳалок бўлгани ҳақида хабар берилган эди. Ҳозирда кучли қишки бўрон оқибатида ҳалок бўлганлар сони 30 нафарга етган. Бу ҳақда WPRI хабар берди.

Манбага кўра, бугун, 27 январь куни Арканзасдан Янги Англиягача бўлган ерларда тахминан 2100 км ҳудудда ярим метрдан ортиқ қор ёғган. Бу транспорт ҳаракатининг тўхташига, рейсларнинг бекор қилинишига ва мактабларнинг ёпилишига сабаб бўлган. Ҳарорат баъзи жойларда -31 даражагача тушган. Синоптиклар Арктика ҳавосининг кириб келиши ва АҚШнинг шарқий қирғоғида яна бир бўрон бўлиши мумкинлиги ҳақида огоҳлантирмоқда.

Шиддатли бўрон қурбонлари орасида Массачусетс ва Огайо штатларида қор тозалагичлар остида қолган икки киши, Арканзас ва Техасда чанада учаётганда ҳалок бўлган ўсмирлар, Канзас ўрмонида топилган бир аёл ҳам бор. Полиция дам олиш кунлари Нью-Йорк шаҳри кўчаларида саккиз кишининг жасадини топган.

Дўл ёғиши туфайли электр узатиш линияларининг узилиши асосан жанубий штатларда яшовчи 560 мингдан ортиқ аҳолининг электрсиз қолишига олиб келган.

Эслатиб ўтамиз, аввалроқ Японияда кучли қор ёғиши оқибатида камида 16 киши ҳалок бўлгани ҳақида хабар берилган эди.