АҚШда биринчи марта одам парранда гриппидан вафот этди

Америка Қўшма Штатларида H5N1 типидаги парранда гриппидан биринчи ўлим Луизиана штатида қайд этилди. Бу ҳақда Луизиана Соғлиқни сақлаш департаменти хабар берди.

Ҳисоботларга кўра, бу АҚШда H5N1 парранда гриппи вирусидан биринчи одам ўлимидир. Марҳумнинг ёши 65 дан ошган. У уй ва ёввойи қушлар билан алоқа қилиш орқали парранда гриппини юқтирган.

Луизиана Соғлиқни сақлаш департаменти маълумотлар махфий бўлгани учун жабрланувчига қандай даволаш кўрсатилганига аниқлик киритмади. Bируснинг одамдан одамга юқиши ҳақида ҳеч қандай далил йўқ ва ягона хавф касалланган ҳайвон билан бевосита алоқада бўлиб қолади.

Департамент парранда гриппидан сақланиш учун қуйидаги тавсияларни берган:

• Касал ёки ўлик ҳайвонларга ёки уларнинг ахлатига тегманг ва касал ёввойи ҳайвонларни уйингизга олиб кирманг;
• Уй ҳайвонларингизни касал ёки ўлик ҳайвонлардан ва уларнинг нажасларидан узоқроқ тутинг;
• Пиширилмаган ёки пишмаган овқатни истеъмол қилманг. Парранда гўшти, тухум ва бошқа ҳайвонот маҳсулотларини керакли ҳароратда пиширинг ҳамда хом ва пиширилган озиқ-овқат ўртасида ўзаро контаминацияни олдини олинг;
• Инфекцион шубҳа қилинган ёки тасдиқланган ҳайвонлардан олинган пастеризацияланмаган хом сут ёки пишлоқ каби пиширилмаган озиқ-овқат маҳсулотларидан сақланинг.

Декабрь ойи охирида АҚШ Касалликларни назорат қилиш ва олдини олиш марказлари (CDC) оғир касалликка чалинган беморда парранда гриппи вирусининг мутацияси аниқлангани ҳақида хабар берди. Sсripps институти олимлари вируснинг фақат битта ўзгариши H5N1 штаммининг одамлар орасида тез тарқалишига олиб келиши ва янги пандемия хавфини туғдириши мумкинлиги ҳақида огоҳлантирди. 2023 йилнинг март ойида ЖССТ эпидемиологи Ричард Пибоди дунёни парранда гриппи пандемияси хавфи ҳақида огоҳлантирган, чунки вирус одамлар ўртасида тарқалиши мумкин.

Эслатиб ўтамиз, 2023 йилнинг май ойида Москванинг бир қатор туманларида парранда гриппи сабабли карантин эълон қилинганди.