АҚШда 50 йил ўлимини кутган маҳбус жазодан қутилиб қолди

АҚШнинг Флорида штати губернатори Рон ДеСантис 50 йил аввал содир этилган шафқатсиз қотиллик учун ўлим жазосига ҳукм қилинган 74 ёшли Уильям Томпсоннинг қатл этилишига оид ордерни бекор қилди. Бу ҳақда “New York Post” нашри хабар берди.

Қайд этилишича, Томпсоннинг қатл этилиши жорий йилнинг 14 октябрига белгиланган. Бироқ губернатор кеча, 9 октябрь куни, қатлга беш кун қолганида, тегишли ҳужжатни бекор қилган. ДеСантис бу қарор сабабларини очиқламаган.

Нашр маълумотларига кўра, Томпсон деменция ва жиддий когнитив бузилишлардан азият чекаётгани айтилмоқда. Унинг адвокати Бриттни Лейси маҳбуснинг соғлиғи кескин ёмонлашгани сабабли шошилинч тиббий ёрдам кўрсатишни сўраган. Нейропсихолог Роберт Оуаунинг хулосасига кўра, Томпсон яқинлашиб келаётган қатлнинг моҳияти ва сабабини тушуниш учун зарур бўлган ақлий қобилиятини йўқотган.

Томпсон 1976 йилда Салли Ивестер исмли аёлнинг ўлдирилишида шериги Рокко Сураче билан бирга айбдор деб топилган. Тергов маълумотларига кўра, эркаклар аёлдан 200 доллар талаб қилган, бироқ у атиги 25 доллар бера олган. Шундан сўнг, улар аёлни занжирлар билан урган, сигарет билан куйдирган ва шафқатсизларча қийноққа солган. Кейин эса ундан онасига қўнғироқ қилиб, қўшимча пул сўрашни талаб қилган. Ивестер олган тан жароҳатлари ва ички аъзоларига етган шикастлар оқибатида вафот этган.

Томпсон дастлаб 1976 йилда ўлим жазосига ҳукм қилинган. Бироқ унинг жазоси кейинчалик бекор қилиниб, 1982 ва 1987 йилларда қатл этилишдан сақлаб қолинган. У 1989 йилда яна ўлим жазосига ҳукм қилиниб, шундан буён ўлим жазосини кутаётган маҳбуслар сафига киритилган.

Маълумот учун, АҚШ Конституциясининг Саккизинчи тузатиши шафқатсиз ва ноодатий жазоларни тақиқлайди. Руҳий касаллик туфайли ўзининг қатл этилиши сабаби ва моҳиятини англай олмайдиган маҳбусларни қатл қилиш ушбу тузатиш билан боғлиқ ҳуқуқий чекловларга дуч келиши мумкин.

Эслатиб ўтамиз, аввалроқ АҚШ Мудофаа вазири Пит Ҳегсет янги тарихда илк бор ҳарбий базада содир этилган жиноят учун собиқ аскар отиш орқали қатл этилиши ҳақида хабар берилган эди.