АҚШ журналистларга Пентагонга киришни тақиқлади

АҚШ Мудофаа вазирлиги Пентагоннинг матбуот офисига журналистларнинг киришини тақиқлади. Бу ҳақда Пентагон матбуот котиби вазифасини бажарувчи Жоэл Валдес кеча, 1 июнь куни маълум қилди.

Валдес мазкур офис “Махфий маълумотлар билан ишлаш учун махсус ҳимояланган ҳудуд” (Sensitive Compartmented Information Facility – SCIF) мақомига ўтказилганини айтган. Унинг сўзларига кўра, бу ердан давлат сирларига доир маълумотлар билан ишловчи нутқ ёзувчилар фойдаланади.

“Бу нутқ ёзувчилар мунтазам равишда махфий материаллар билан ишлайди ва Пентагоннинг махфий маълумотлар тармоғи – SIPRNet тизимига кириш ҳуқуқига эга”, деган Валдес.

Унинг таъкидлашича, эндиликда журналистларга ушбу офис ҳудудига киришга рухсат берилмайди. Мудофаа вазирининг жамоатчилик билан алоқалар бўйича ёрдамчиси ва матбуот котиби офисларига эса фақат олдиндан келишилган учрашув орқали кириш мумкин бўлади.

Мазкур қарор Трамп маъмурияти томонидан оммавий ахборот воситаларининг ҳарбий соҳани ва давлат идоралари фаолиятини ёритиш имкониятларини қисқартиришга қаратилган бир қатор чора-тадбирлар ортидан қабул қилинди.

Жорий йилнинг март ойида АҚШ Мудофаа вазирлиги журналистларга Пентагон ҳудудида доимий офис сақлаш ҳуқуқи бекор қилинишини маълум қилган эди. Бу қарор суд "The New York Times" газетаси томонидан матбуот аккредитацияси қоидаларига қарши киритилган даъво юзасидан нашр фойдасига қарор чиқарганидан кейин қабул қилинган. Шунингдек, Пентагон журналистлар бинода ҳаракатланиши учун расмий кузатувчи ҳамроҳ бўлишини мажбурий қилиб белгилаган. Нашр мазкур тартибни бекор қилишни талаб қилиб, май ойида яна бир суд даъвосини киритган.

АҚШ журналистларининг энг йирик касбий ташкилоти ҳисобланган Миллий матбуот клуби янги чекловларни Трамп маъмуриятининг Пентагон устидан журналистик назоратни чеклашга қаратилган ҳаракатларидаги “ташвишли эскалация” деб атаган.

“АҚШ армияси ҳақида мустақил журналистик ёритиш – ихтиёрий эмас, балки заруратдир”, деган Миллий матбуот клуби президенти Марк Шоэфф баёнотида.

Унинг таъкидлашича, журналистлар ёритаётган муассасалардан узоқлаштирилганда, Америка жамоатчилиги камроқ маълумот олади, шаффофлик ва назорат даражаси пасаяди.

Эслатиб ўтамиз, аввалроқ Пентагон 7 та сунъий интеллект компанияси билан келишувга эришганини маълум қилган эди.