АҚШ ЖЧда дронларга қарши кураш учун 250 млн доллар ажратди

АҚШнинг Вашингтон маъмурияти 2026 йилги футбол бўйича Жаҳон чемпионати вақтида учувчисиз учиш аппаратларига қарши чораларни кучайтириш учун 11 штат ҳокимиятига 250 миллион доллар ажратди. Бу ҳақда АҚШнинг Фавқулодда вазиятлар бўйича федерал агентлиги хабар берди.

Ҳужжатда қайд этилишича, идора чемпионат учрашувлари ўтказиладиган 11 штатга, шунингдек АҚШ пойтахт минтақасига грантлар кўринишида 250 миллион доллар ажратган. Баёнотда айтилишича, “маблағ олувчилар ушбу маблағлардан дронларни аниқлаш, идентификация қилиш, кузатиш ҳамда уларга қарши чоралар кўриш имкониятларини ривожлантириш учун фойдаланишлари мумкин”.

“Охирги йилларда жиноятчилар, террорчилар ва душманона кайфиятдаги хорижий субъектлар учувчисиз аппаратлардан фаолроқ фойдалана бошлади... Биз дронлар билан боғлиқ ортиб бораётган таҳдид фонида Жаҳон чемпионатида хавфсизликни таъминлаш учун тезкор ҳаракат қилиш зарурлигини билардик ва биз айнан шундай қилдик”, дейди агентлик вакили.

Маълумот учун, 2026 йилги футбол бўйича Жаҳон чемпионати 11 июндан 19 июлгача Канада, Мексика ва АҚШда бўлиб ўтади. Унда илк бор 48 та терма жамоа иштирок этади.

Эслатиб ўтамиз, аввалроқ FIFA 2026 йилги футбол бўйича Жаҳон чемпионати томошабинлар тажрибасини тубдан ўзгартириши кутилаётган икки катта янгиликни тақдим этганди. Хусусан, Жаҳон чемпионати финал учрашувида Америка Суперкубогидан илҳомланган махсус танаффус шоуси намойиш этилади. Шунингдек, FIFA ОАВ учун янгиланган, янада қатъий қоидаларни жорий қилган. Унга кўра, мураббийлар ва футболчилар ўйинлар вақтида, яъни биринчи бўлим якунлангач мажбурий телеинтервью беришлари лозим.