АҚШ зарбалари тўхтаса, биз ҳам ҳужумларимизни тўхтатамиз – Эрон манбаси

Эрон АҚШ ҳужумларни тўхтатган тақдирда ўз зарбаларини ҳам тўхтатишини билдирди. Бу ҳақда “Reuters” агентлигига исми ошкор этилмаган юқори лавозимли эронлик манба маълум қилган.

Манбанинг айтишича, Теҳроннинг позицияси ўзгармаган: “зарбага – зарба”. Агар АҚШ ҳужумларни тўхтатса, Эрон ҳам ҳарбий амалиётларини тўхтатади. Унинг сўзларига кўра, бу хабар Вашингтонга аллақачон етказилган.

13 кеча давом этган АҚШ ҳаво ҳужумларидан сўнг Пентагон 24 июль куни кечқурун бомбардимонларни тўхтатган. Шундан бери 25-26 июль кунлари АҚШ томонидан янги ҳужумлар қайд этилмаган. АҚШ базалари жойлашган қўшни давлатларга ҳар кеча жавоб зарбалари бериб келган Эрон ҳам икки кундан буён ҳужумларни амалга оширмаган.

АҚШнинг БМТдаги элчиси Майк Уолтц “Fox News” телеканалига берган интервьюсида Президент Дональд Трамп дипломатия учун вақт бериш мақсадида ҳужумларни вақтинча тўхтатишга қарор қилганини айтган.

“У музокараларга имконият беряпти, уларга бироз вақт ажратяпти”, деган Уолтц.

Агентлик суҳбатлашган америкалик расмийнинг айтишича, сўнгги икки ҳафтада Ҳормуз бўғозидаги денгиз қатновига таҳдидларни жиловлаш мақсадида амалга оширилган зарбалар аввалдан белгиланган нишонлар захирасини деярли тугатган.

Манбанинг билдиришича, АҚШ Қуролли кучлари штаб бошлиқлари қўмитаси раиси генерал Дэн Кейн Трампни йирик ҳарбий амалиётларни қайта бошлаш қурол-яроғ захираларига салбий таъсир кўрсатиши мумкинлиги ҳақида шахсан огоҳлантирган. Бу, жумладан, Яқин Шарқдаги АҚШ ҳаво мудофааси қўллаётган тутиб қолувчи ракеталарга ҳам тааллуқли.

NBC телеканалининг “Meet the Press” дастурида Майк Уолтц АҚШ ҳарбийлари зарур бўлган барча воситаларга эга эканини айтган. Шу билан бирга, унинг таъкидлашича, Мудофаа вазири Пит Хегсет лавозимга келганда “камайиб кетган захиралар”ни қабул қилиб олган.

“Ҳужумлар тўхтаганига нисбатан оптимизмдан кўра шубҳа кучлироқ. Асосий қараш шуки, бу танаффус ҳақиқий эмас, балки тактик характерга эга. Эрон АҚШнинг, деб ҳисоблайдиган, алдашларидан етарлича аччиқ тажриба тўплаган”, деган манба.

Маълумот учун, сўнгги икки ҳафта давомида АҚШ Ҳормуз бўғозидаги кемаларга қилинган ҳужумларга жавоб сифатида ҳар кеча Эронга зарбалар бериб келган. Эрон эса жавоб тариқасида Форс кўрфази араб давлатларидаги денгиз сувини тузсизлантириш иншоотларига ҳужумлар уюштирган.

“Reuters” ёзишича, АҚШнинг янги ҳарбий кампанияси ўтган ой урушни тўхтатишга қаратилган оралиқ келишувни амалда барбод қилган. CNN телеканали хабарига кўра, 24 июль кунги йиғилишда вице-президент Жей Ди Вэнс ҳам ҳужумларни давом эттириш юзасидан эҳтиёткорлик билдирган. “Axios” эса Яқин Шарқдаги АҚШ қўшинлари қўмондони адмирал Брэд Купер бомбардимонлар самарадорлик чегарасига етгани учун уларни тўхтатишни тавсия қилганини хабар қилган.

Эслатиб ўтамиз, аввалроқ АҚШ Президенти Дональд Трамп Эронга янги миқёсда зарбалар беришни кейинга сурганди.