АҚШ Европа ва Киев билан шу ҳафтада сулҳга эришмоқчи – ОАВ

АҚШ жорий ҳафтанинг ўзида Европа ва Киев билан Украинада ўт очишни тўхтатиш бўйича келишувга эришмоқчи. Бу ҳақда Америка маъмуриятининг юқори мартабали вакили “The New ork Post” нашрига берган интервьюсида сўз очди.

“Бу ҳафта Лондонда биз ўт очишни тўлиқ ва кенг қамровли тўхтатиш тўғрисида қарор қабул қилмоқчимиз”, деган нашр суҳбатдоши.

Унинг сўзларига кўра, музокараларда АҚШ, Украина, Франция, Германия ва Буюк Британия вакиллари иштирок этади ва янги келишувлар кўриб чиқлади.

АҚШ вакилининг қўшимча қилишича, Украина Мудофаа вазири Рустам Умаров АҚШ расмийларига Киев АҚШ Президенти Дональд Трампнинг Парижда Давлат котиби Марко Рубио ва икки махсус вакил томонидан тақдим этилган тинчлик ташаббусини “90 фоиз” қўллаб-қувватлашини айтган.

Маълумот учун, ўт очишни тўлиқ тўхтатиш жорий йилнинг 17 апрель куни Парижда АҚШ, Украина ва Европа давлатлари вакиллари ўртасида бўлиб ўтган музокараларнинг асосий мавзуларидан бири бўлди. Украина Президенти офиси раҳбари Андрей Ермак музокараларни “жуда мазмунли” деб атаган. Украина расмийлари март ойида Саудия Арабистонида АҚШ делегацияси билан учрашувда билдирилган позицияни такрорлаган: Москва ҳам шундай қилса, Киев сулҳга рози бўлади.

Кремль Россия ўт очишни тўхтатиш зарурлигини қўллаб-қувватлашини, бироқ бунгача Украинани ҳарбийлаштириш билан боғлиқ “бир қатор саволларга жавоб бериш” кераклигини айтган.
Олдинроқ Рубио келишувнинг аниқ белгилари пайдо бўлмаса, бир неча кун ичида келишувда АҚШ воситачи бўлишга уринишни тўхтатишини айтган эди. Буни Трамп ҳам тасдиқлаган.

Шу билан бирга, АҚШ вице-президенти Жеймс Дэвид Вэнс Киев, Брюссель ва Вашингтон вакилларининг Париждаги учрашувларидан сўнг, келишув муҳокамаси чоғида “қизиқарли воқеалар” содир бўлганини айтган.