АҚШ ва Европа бош дипломатлари Украина бўйича музокараларни қолдирди

АҚШ, Германия, Буюк Британия, Франция ва Украина олий даражадаги дипломатлари бугун, 23 апрель куни Лондонда бўлиб ўтиши керак бўлган Украинадаги урушни тугатиш бўйича олий даражадаги музокаралардаги иштирокини бекор қилди. Бу ҳақда “Sky News” хабар берди.

Қайд этилишича, бунинг ўрнига юқорида номи тилга олинган беш давлатнинг “юқори амалдорлари” Британия пойтахтида учрашади. Шу билан бирга, Украина Ташқи ишлар вазири Андрей Сибига ҳам Лондонда бўлиб, у ерда Буюк Британия Ташқи ишлар вазири Дэвид Лэмми билан учрашиши кутилмоқда.

“Axios” портали ҳам исми ошкор этилмаган америкалик мулозимга таяниб, 23 апрель куни Давлат департаменти раҳбари “Лондонга бормаслик тўғрисида қарор қабул қилгани” ҳақида хабар берганди.

“Бунинг ўрнига Америка делегацияси британиялик ва украиналик ҳамкасблари билан музокараларни давом эттиради”, дейди нашр манбаси.

АҚШ Давлат котиби Марко Рубионинг ўзи Х ижтимоий тармоғида британиялик мавқедоши билан “самарали” суҳбат ўтказгани ва Лондондаги муҳокамалардан сўнг “давом этишни” интиқлик билан кутаётганини ёзган.

Қайд этиш жоиз, аввалроқ Рубио АҚШнинг бу борадаги таклифлари бўйича яқин кунларда ҳеч қандай тараққиёт кузатилмаса, Вашингтон Украинадаги урушни тугатиш бўйича музокаралардан узоқлашиши ҳақида огоҳлантирган эди.

Кеча, 22 апрель куни “The New York Times” газетаси Марко Рубио Украина бўйича музокараларнинг навбатдаги босқичини ўтказиб юбориш ниятида эканини, чунки “Украина Президент Трампнинг Россия билан курашни тўхтатувчи келишув бўйича асосий таклифларидан бирини рад этгани” ҳақида хабар берди.

“Axios” интернет нашри эса бугун, 23 апрель куни ёзишича, АҚШ Президенти Дональд Трампнинг “сўнгги таклифи” Киевнинг Украинанинг Қрим яриморолини Россия Федерациясининг бир қисми сифатида тан олишини, шунингдек, Украина шарқидаги ҳарбий ҳаракатлар бошланганидан кейин Россия эгаллаган ҳудудлар устидан Россия назоратини норасмий равишда тан олишини назарда тутади. 

“Axios” маълумотларига кўра, Америка томони ўтган ҳафта Парижда Киев вакилларига тегишли режани тақдим этган. “Financial Times” газетасининг хабар беришича, режа тақдим этилганидан кейин Россия Президенти Владимир Путин мумкин бўлган тинчлик келишувининг бир қисми сифатида ҳозирги фронт чизиғини музлатишни таклиф қилган.

Бироқ кеча, 22 апрель куни Украина Президенти Владимир Зеленский Россиянинг Қримни аннексия қилишини қонунийлаштириш билан боғлиқ шартларни рад этди. Зеленский Украина Қримнинг босиб олинганини қонуний тан олмаслигини, чунки бу Украина Конституциясига зид эканини таъкидлади.

22 апрель куни Оқ уй матбуот котиби Кэролайн Ливитт журналистлар учун навбатдаги брифингда АҚШ Президентининг махсус вакили Стивен Уиткофф шу ҳафта охирида яна Москвага Путин билан музокаралар олиб боришини маълум қилди. Бу унинг Россия Президенти билан тўртинчи учрашуви бўлади.

Уиткофф охирги марта Россияга 11 апрель куни ташриф буюрган эди. Ўшанда у Санкт-Петербургда Путин билан учрашди. Суҳбат тўрт соатдан ортиқ давом этди, асосий мавзу Украинадаги келишув бўлди. Суҳбат тафсилотлари очиқланмади.

Бошқа томондан, Уиткофф ва Рубио дастлаб қатнашмоқчи бўлган Лондондаги Украина музокараларини ўтказиб юборади. Бунинг ўрнига Трампнинг Украина бўйича махсус вакили Кит Келлогг Буюк Британия пойтахтида АҚШдан вакиллик қилади.