АҚШ ва Британиянинг собиқлари учрашди

Буюк Британиянинг собиқ бош вазири Борис Жонсон АҚШ бўйлаб сафари чоғида собиқ президент Дональд Трамп билан Украинадаги вазиятни муҳокама қилиш учун учрашди. Суҳбат тафсилотларини “The Guardian” ошкор қилди. 

Жонсоннинг матбуот котиби Трамп билан Украинанинг Россия устидан қозонган ғалабаси “ҳаётий зарурат” экани муҳокама қилинганини айтган. АҚШнинг собиқ президенти бунга жавобан Украина инқирозини “ғалаба ва мағлубият” контекстида ўйламаслигини билдирган. 

"Мен ўлим билан боғлиқ ушбу жараёнларнинг бутунлай тўхташини хоҳлайман. Руслар ва украинлар ўляпти”, дейди Трамп.

Собиқ раҳбарларнинг қаерда учрашгани ошкор этилмаган. Жонсон Трампни Киевни қўллаб-қувватлаш зарурлигига ишонтиришга уринган бўлиши мумкин.

Трамп, шунингдек, Жонсон билан суҳбатда 2024 йилда бўлиб ўтадиган АҚШ президентлик сайловларида иштирок этишга тайёрлигини айтиб ўтган. Маълумот учун, NBC телеканали апрель ойида ўтказган сўровномада, республикачи сайловчиларнинг 46 фоизи Трампнинг номзодини қўллаб-қувватлашини билдирган.

Жонсон сафари давомида Техасдаги республикачи сиёсатчилар ва Трампнинг собиқ давлат котиби Майк Помпео билан ҳам учрашиб, Украинани қўллаб-қувватлаш кучайтирилиши кераклигини айтган. Жонсон, аввалроқ, Украинага бир неча бор борган ва Ғарбни мамлакатга кўпроқ қурол-яроғ етказиб беришга чақирган эди.