АҚШ Ўзбекистондаги устав капитали 1 млн доллар бўлган компанияни “қора рўйхати”га киритди

АҚШ Савдо вазирлигининг Саноат ва хавфсизлик бюроси Россиядан 12 та ва Ўзбекистондан битта компанияга Америка технологиялари ва товарларини етказиб беришни чеклади. Чунки АҚШ ҳукумати бу ташкилотларнинг хатти-ҳаракатлари миллий хавфсизлик ҳамда мамлакат манфаатлари ва ташқи сиёсатига зид, деб ҳисоблаган. Бу ҳақда АҚШ Савдо вазирлиги томонидан эълон қилинган ҳужжатда келтирилди.

АҚШ расмийларининг фикрича, санкциялар рўйхатига киритилган ташкилотлар Россия Қуролли кучларини учувчисиз учиш аппаратларини сотиб олиш, ишлаб чиқиш ва тарқатиш орқали қўллаб-қувватлайди. Бошқалар қаторида Россиянинг дрон ишлаб чиқарувчи ZALA Aero компанияси ҳам рўйхатга киритилган.

Чекловлар шунингдек қуйидагиларни ўз ичига олади:

• Aeroscan МЧЖ;
• "Alfakomponent" МЧЖ;
• "BIK Inform" МЧЖ;
• Hartis DV МЧЖ;
• ID Solution МЧЖ;
• OMP МЧЖ ;
• "Orelmetalpolymer" МЧЖ ;
• "Spel" МЧЖ;
• "Spetstexnotrade" МЧЖ;
• "NTC Orion" МЧЖ;
• Windeq Technical Center МЧЖ;
• Mvizion (Ўзбекистон).

Aeroscan ZALA Aero  компаниясининг асосий ташкилоти бўлиб, бошқа нарсалар қаторида Россия кучлари Украинадаги урушда фойдаланадиган Lancet ўқ-дорилари ва разведкачи дронларини ишлаб чиқаради.

Ўз навбатида, ZALA Aero Калашников концерни таркибига киради. У 2015 йилдан бери АҚШ санкциялари остида бўлган ва июль ойида яна санкциялар рўйхатига киритилган. Концерн раҳбари Владимир Лепин ҳам чекловларга дучор бўлган.

Ўзбекистон Mvizion ва Россиянинг Hartis DV компаниялари электрон бутловчи қисмларни етказиб бериш билан шуғулланади. Ўзбекистон корхона ва ташкилотларининг ягона давлат реестрига кўра, Mvizion 2022 йил июнь ойида рўйхатга олинган. Компаниянинг устав капитали 1 миллион долларни ташкил этади.

"BIK Inform" видеокузатув тизимларини ишлаб чиқиш ва ишлаб чиқаришга ихтисослашган. У турли соҳалар учун саноат ускуналарини етказиб бериш ва жорий этиш билан шуғулланади. Alfacomponent батареялар билан таъминлайди.