АҚШ ўз визасига эга 55 млн кишини текширишни бошлади

Кеча, 21 август куни АҚШ Давлат департаменти 55 миллиондан ортиқ чет элликларнинг маълумотларини текширишни бошлади. Улар АҚШнинг турли визаларига эга бўлиб, қонунбузарлик аниқланса, визалар бекор қилинади ва мамлакатдан чиқариб юборилади. Бу ҳақда департаментга таяниб, “Associated Press” хабар берди.

Қайд этилишича, барча виза эгалари “доимий текширувдан” ўтказилади. Бу жараён ҳужжатнинг амал қилиш муддати тугаши, жиноий фаолияти, жамоат хавфсизлигига таҳдид, террорчилик фаолиятида иштирок ёки террорчилик ташкилотларини қўллаб-қувватлаш каби “талабларга мос келмаслик аломатларини” аниқлашга қаратилган.

Шундай белгилар топилса, виза бекор қилинади, агар унинг эгаси АҚШ ҳудудида бўлса депортация қилинади. Давлат департаменти текширувда “мавжуд барча маълумотлардан” фойдаланишини, жумладан, ҳуқуқни муҳофаза қилиш органлари ва иммиграция хизматлари базалари ҳамда ижтимоий тармоқлардаги ҳисобларни ҳам назорат қилаётганини билдирган.

Қайд этиш жоиз, Трамп жорий йилнинг январида президентлик лавозимига киришганидан бери унинг маъмурияти АҚШдаги ноқонуний мигрантларни чиқаришга катта эътибор қаратмоқда. Шунингдек, бир нечта талаба визаси ва алмашинув дастури доирасидаги меҳмон визаларига эга шахслар ҳам чиқариб юборилган.

Хусусан, шу ҳафта АҚШ Давлат департаменти 6 мингдан ортиқ талаба визаси бекор қилинганини маълум қилган. Улардан қарийб 4 мингтаси қонунбузарлик сабабли, яна 200-300 таси эса терроризмга алоқадорлиги учун, жумладан, террорчи ташкилотларни ёки "терроризм ҳомийси" деб тан олинган давлатларни қўллаб-қувватлагани учун мамлакатдан қувилган.

Эслатиб ўтамиз, аввалроқ Дональд Трамп Мексика билан чегарадаги деворни қора рангга бўяшни хоҳлашини маълум қилганди. Президентнинг фикрича, қора рангли девор қуёш таъсирида жуда қизиб кетади ва бу мигрантларнинг деворга чиқиш истагини камайтиради.