АҚШ ўрнига ЕИ “Озодлик радиоси”ни молиялаштириши мумкин

Европа Иттифоқи (ЕИ) АҚШ Глобал медиа агентлиги (USAGM) томонидан назорат қилинадиган “Озодлик радиоси”ни молиялаштиришни ўз зиммасига олиш имкониятини кўриб чиқмоқда. Бу ҳақда бугун, 17 март куни ЕИнинг Ташқи ишлар ва хавфсизлик сиёсати бўйича олий вакили Кая Каллас Брюсселда Европа Иттифоқи Ташқи ишлар вазирлиари йиғилишидан кейинги матбуот анжуманида айтиб ўтди.

Унинг сўзларига кўра, бир қанча Европа вакиллари “Озодлик радио”сини сақлаб қолиш учун ҳаракат қилиши керак.

“Биз маблағ ажратиб, АҚШ маблағлари ўрнини тўлдира оламизми? Европа Иттифоқига аъзо давлатлар Ташқи ишлар вазирлари буни муҳокама қилишимизни ва ечим топишни талаб қилишди”, деди у.

Дипломатнинг таъкидлашича, минтақавий ҳамдўстлик “Озодлик радиоси”га ёрдам учун пул ажратишни “автоматик равишда” бошлаши мумкин эмас. Сабаби шунга ўхшаш илтимос билан Брюсселга кўплаб бошқа ташкилотлар мурожаат қилмоқда.

Калласнинг таъкидлашича, ушбу оммавий ахборот воситалари “демократия маёғи”дир. Шунингдек, у АҚШ ҳукумати унга сармоя киритишни тўхтатганидан афсусда эканини билдирган.

Эслатиб ўтамиз, кеча, 16 март кунидан бошлаб “Америка овози” ва “Озодлик радиоси” ўз фаолиятини тўхтатгани хабар қилинганди. “Америка овози” вакиллари 1,3 мингдан ортиқ журналист, продюсер ва радио ходимлари таътилга чиқарилгани ҳақида электрон хат олган. Ушбу ёпилиш 15 март куни Доналд Трамп “Озодлик радиоси” ва “Америка овози” нашрлари, шунингдек, яна олти федерал агентлик фаолиятини назорат қиладиган АҚШ Глобал медиа агентлигини (USAGM) тугатиш тўғрисидаги фармонни имзолагандан сўнг юзага келган.