АҚШ украиналик муҳожирларни қабул қилишни тўхтатди

north_east

АҚШ марказий осиёлик мигрантларни Коста-Рикага депортация қилади

АҚШ ҳукумати Лотин Америкаси давлатлари ва Украина фуқароларининг мамлакатга кириш учун иммиграция аризаларини қабул қилишни тўхтатди. Бу ҳақда СBC News хабар берди.

Маълумотларга кўра, Қўшма Штатлар АҚШнинг собиқ президенти Жо Байден  даврида кучга кирган  иммиграция билан боғлиқ дастурларни бекор қилган. Шунингдек, Украина ва Лотин Америкаси давлатлари фуқароларининг мамлакатга кириш учун иммиграция аризаларини қабул қилмаслигини айтган.

Билдирилишича, ҳукумат амалдорлари мамлакатда фирибгарликнинг потенциал ҳолатларини аниқлаш, миллий ва жамоат хавфсизлиги билан боғлиқ тартиб-қоидаларни яхшилаш мақсадида дастурни номаълум муддатгача музлатган.

Маълумотларга кўра, 2023 йил сентябрига қадар ушбу дастур орқали АҚШга 150 мингдан ортиқ украиналиклар кирган.

“Илгари бу ҳақда огоҳлантирилмаганлиги учун бу қарор иммиграция имтиёзлари учун ариза бериш жараёнида бўлган кўплаб муҳожирларни хавотирга солиши мумкин. Талабгорларнинг аниқ сони номаълум бўлса-да, аризаларни тўхтатиш Байден маъмурияти даврида ташкил қилинган бир нечта миграция дастурларига нисбатан амал қилади”, дейилади хабарда.

Маълумот учун, АҚШ Президенти Дональд Трамп қаттиққўл антимиграция сиёсати билан танилган ва сайловларда ғалаба қозонишидан олдин ҳам жиноятчиларни чиқариб юбориш учун Америка тарихидаги энг йирик депортация дастурини бошлашга ваъда берган эди. У президентликнинг биринчи кунида АҚШда бошпана сўровчилар учун чегарани кесиб ўтишга имкон берган CBP one иловасини ёпишни буюрди. 23 январь куни Трамп ноқонуний муҳожирларга АҚШ-Мексика чегарасидан ўтишни тақиқлаб, давлат идораларига бундай йўл билан мамлакатга кирганларни депортация қилиш ваколатини берди.

Эслатиб ўтамиз, аввалроқ АҚШ Ички хавфсизлик вазирлигининг Фуқаролик ва иммиграция хизмати (USCIS) бўлими иммигрантларга мамлакатда вақтинча яшаш имконини берувчи бир қатор дастурларни тўхтатиш бўйича кўрсатма берган эди.

Бунёд Келдибоев