АҚШ Украинага F-16 беришга рози бўлди. Фақат бировникини

Америка Қўшма Штатлари Дания ва Нидерландиянинг F-16 қирувчи самолётларини Украинага топширишга рози бўлди. Бу ҳақда “Reuters” агентлиги манбага таяниб хабар берди.

Нашрнинг қайд этишича, украиналик учувчиларни F-16 да учиш бўйича ўқув машғулотлари тугагандан сўнг, давлатлар Киевга қирувчи самолётларини жўнатади.

АҚШ Давлат котиби Энтони Блинкен аллақачон Дания ва Нидерландиядаги ҳамкасбларига Вашингтон бу ҳаракатни қўллаб-қувватлаши ҳақида мактуб йўллаган.

"Мен буни Қўшма Штатлар номидан Украинага F-16 қирувчи самолётларини топширишни ва украиналик учувчиларни малакали инструкторлар томонидан ўқитишни тўлиқ қўллаб-қувватлашни билдириш учун ёзяпман", дейди Блинкен.

АҚШ Давлат котибининг сўзларига кўра, учинчи давлатлар томонидан етказиб бериш бўйича сўровларнинг маъқулланиши биринчи учувчилар гуруҳи ўқишни якунлаши биланоқ Украинага янги имкониятлардан фойдаланиш имконини беради.

Эслатиб ўтамиз, олдинроқ Украина Қуролли кучлари Ҳарбий ҳаво кучлари қўмондонлиги вакили Юрий Игнат келаси баҳоргача мамлакати Американинг F-16 қирувчи самолётларини қабул қила олмаслигини маълум қилганди.