АҚШ Украинада 20 апрелгача оташкесимга эришмоқчи – “Bloomberg”

Оқ уй Украинада 20 апрель, Пасха байрамига қадар ўт очишни тўхтатиш бўйича келишувга эришмоқчи. Бу ҳақда бугун, 23 март куни аноним манбаларга таяниб, Американинг “Bloomberg” агентлиги  хабар берди.

Уларнинг маълумотларига кўра, АҚШ маъмуриятининг ўзи бу муддатлар ўзгариши мумкинлигини тан олади, чунки урушаётган томонларнинг позициялари кўп жиҳатдан қарама-қаршидир.

“Bloomberg” агентлиги АҚШ Миллий хавфсизлик кенгаши матбуот котиби Брайан Хьюзнинг “музокаралар шартлари ёки вақти ОАВда муҳокама қилинишига” қарши эканини айтган. Агентликнинг бошқа манбалари тинчлик келишувига эришилмагунча Кремль Дональд Трамп ва Владимир Путиннинг шахсий учрашувига рози бўлмайди, деган фикрни билдирган. Уларнинг ишонишича, апрель ойининг ўрталарида бу эҳтимолдан йироқ.

north_east

Трамп Путинни 2 соат давомида нималарга кўндирди?

“АҚШ яқин орада Украинада тинчлик битимига умид қилмоқда, аммо Путин шошилмаётганга ўхшайди”, деб ёзади “Bloomberg”.

Мисол тариқасида агентлик Россия ва Украина ўртасида давом этаётган ўзаро дрон ҳужумларини, шунингдек, Федерал хавфсизлик хизмати ходими Сергей Беседанинг Россия Федерацияси учун музокарачи бўлганини келтиради. “Bloomberg” Москванинг музокаралардаги талабларини “максималистик” деб атади.

Ҳозирча АҚШ Саудия Арабистонида Россия ва Украина вакиллари билан алоҳида учрашувлар ўтказмоқда. У ерда энергетика инфратузилмасига қарши ўт очишни 30 кунга тақиқлаш мониторинги, шунингдек, Қора денгизда эҳтимолий ўт очишни тўхтатиш масалалари муҳокама қилинмоқда.