АҚШ Россияга қарши санкцияларни кечиктирди

Россияга қарши “ҳалокатли” санкцияларни назарда тутувчи қонун лойиҳасининг кўриб чиқилиши АҚШ Президенти Дональд Трамп ва Россия Президенти Владимир Путин учрашувигача кечиктирилди. Бу ҳақда АҚШ Сенатидаги республикачилар етакчиси Жон Тюн “Bloomberg”га берган интервьюсида сўз очди.

“Ҳозирча биз пауза тугмасини босдик”, деган Тюн.

Гап 2025 йилнинг апрель ойида сенаторлар Линдси Грэм ва Ричард Блументал томонидан таклиф қилинган лойиҳа ҳақида кетмоқда. Унда Россия Украинага узоқ муддатли тинчликка рози бўлмаган тақдирда, Россия нефть, газ, уран ва бошқа маҳсулотларини сотиб оладиган давлатлардан импортга 500 фоизлик бож жорий этилиши назарда тутилган.

Сенаторлар ушбу чораларни 2025 йилнинг июнь ўрталарида бўлиб ўтган G7 саммитигача қабул қилишни режалаштиришган, бироқ лойиҳанинг илгари сурилиши Россия–Украина можаросини ҳал этиш бўйича Трампнинг баёнотлари ортидан вақтинча тўхтатилган.

Грэмнинг сўзларига кўра, унинг “ҳалокатли” санкциялар ҳақидаги лойиҳасини 100 сенаторнинг 80 дан ортиғи қўллаб-қувватлашга тайёр эди. Бироқ 4 август куни Сенат таътилга чиқиб, янги санкцияларни жорий этиш бўйича якуний қарорни Трампнинг ўзига қолдирди. Президент санкцияларни фармон орқали жорий қилиши мумкин.

Россия Президенти матбуот котиби Дмитрий Песков эса бунга жавобан, Россия “анчадан бери жуда кўп санкциялар остида яшаб келаётганини“ ва бунинг натижасида “иммунитет” шаклланганини таъкидлади.

Трамп ва Путин учрашуви 

Жорий йилнинг 16 октябрь куни телефон орқали бўлиб ўтган суҳбатдан сўнг, Путин ва Трамп Будапештда учрашишга келишиб олди. Республика партияси вакилига кўра, Трампнинг Путин билан музокаралари икки ҳафта ичида бўлиб ўтиши кутилмоқда.

Песков ҳам музокаралар “ҳақиқатан ҳам икки ҳафта ичида ёки бироз кейинроқ бўлиб ўтиши мумкинлигини” инкор этмаган.

Будапештдаги учрашувнинг асосий мавзуси Украинадаги можарони узоқ муддатли ҳал этиш йўллари бўлиши кутилмоқда. Ўтган саммит натижасида томонлар якуний келишувга эришмаган бўлса-да, қисман тараққиёт қайд этилган ва диалогни давом эттиришга тайёр эканликларини билдирган.