АҚШ Путиннинг янги ядровий таҳдидларига жавоб қайтарди

АҚШ Давлат котиби Энтони Блинкен Россия Президенти Владимир Путиннинг ядровий қурол таҳдиди масъулиятсиз экани ва дунё кўпроқ қуролсизланишга муҳтожлигини айтди. Бу ҳақда у MSNBC телеканалига берган интервьюсида сўз очди.

“Ўйлайманки, дунёда кўпчилик аввал ҳам ядро қуроли билан таҳдид қилган, масалан, Хитой ҳам. Шунинг учун мен ҳозир кўпроқ қуролсизланиш ва қуролларни тарқатмаслик ҳақида мулоқот қилишга чақирган бўлардим”, деган Блинкен.

Яқинда Владимир Путин яна бир бор ядро қуролидан фойдаланиш ҳақида гапирди. Хусусан, у Россиянинг ядровий доктринасига ўзгартиришлар киритилишини, ядровий арсеналдан фойдаланиш шартларини кенгайтириш бўйича режаларни эълон қилди. У мавжуд меъёрларни тузатиш зарурлигини ҳозирги ҳарбий-сиёсий вазиятдаги “динамик ўзгаришлар” ҳамда Россия Федерацияси ва унинг иттифоқчилари учун “ҳарбий таҳдидлар ва хавфларнинг янги манбаларининг пайдо бўлиши” билан боғлади. Путин Россия Федерацияси ва Белaрусга қарши "агрессия содир бўлган тақдирда ядро қуролидан фойдаланиш ҳуқуқини" ўзида сақлаб қолишини таъкидлади. Бундан ташқари, у Беларусь ҳукмдори Александр Лукашенко билан "бу масалаларнинг барчаси келишилган"ини айтди.

Айни пайтда, 2020 йилдан бери амалда бўлган Россиянинг ядровий тўхтатувчилик доктринасига ўзгартиришлар киритилиши номаълумлигича қолмоқда. Ушбу ҳужжатга кўра, Россия Федерацияси ўзига ёки унинг иттифоқчиларига қарши ядровий ёки бошқа оммавий қирғин қуролларини қўллашга жавобан, шунингдек, "Россия Федерациясига одатий қуроллардан фойдаланган ҳолда тажовуз қилинган тақдирда, давлатнинг мавжудлиги таҳдид остида бўлса", ядро қуролидан фойдаланиши мумкин.

Эслатиб ўтамиз, аввалроқ Брюсселда бўлиб ўтган брифингда ЕИ ташқи сиёсати вакили Питер Стано Россия Путиннинг ядровий доктринани ўзгартириш ҳақидаги баёнотини “ўта масъулиятсиз ва қабул қилиб бўлмайдиган хатти-ҳаракатларининг давоми” деб атаганди. Станога кўра, бу Путиннинг ядровий арсенал билан биринчи марта қимор ўйнаши эмас.