АҚШ президентлигига номзод ЙТҲга учради

Республикачилар партиясидан Америка Қўшма Штатлари президентлигига номзод Рон Десантис автоҳалокатга учради. Бу ҳақда сиёсатчининг матбуот котибига таяниб, “Fox News” хабар берди. 

Маълум қилинишича, бугун, 25 июль куни Республикачилар партиясидан президентликка номзод ва Флорида штати губернатори Рон Десантис ҳамда унинг жамоаси Теннесси штатида автоҳалокатга учраган. 

“Бугун эрталаб губернатор Теннесси штатининг Чаттанога шаҳридаги тадбирга кетаётганда автоҳалокатга учради. У ва унинг жамоасидагилар жароҳат олмаган”, дейди губернаторнинг матбуот котиби Брайан Гриффин.

Маълумот учун, 44 ёшли америкалик сиёсатчи 2013 йилдан 2018 йилгача АҚШ Вакиллар палатаси аъзоси бўлган. У 2019 йил 8 январдан буён Флорида губернатори сифатида фаолият олиб бормоқда. 

Эслатиб ўтамиз, аввалроқ Десантис 2024 йилнинг ноябрь ойида бўлиб ўтадиган АҚШ президентлик сайловида иштирок этиш учун ҳужжат топширган эди. Дональд Трамп эса Рон Десантисни АҚШ президентлигига номзодини эълон қилгани билан шахсан табриклаган.