АҚШ Кариб денгизига қўшимча қўшин жойлаштирди – WSJ 

АҚШ шу ҳафта Кариб ҳавзасига Ҳарбий-ҳаво кучларининг махсус операцияларига тегишли кўплаб самолётлар, қўшинлар ва ҳарбий ускуналарни жойлаштирди. Бу ҳақда кеча, 23 декабрь куни “The Wall Street Journal” хабар берди.

WSJ манбалари ва кузатув тизимлари маълумотларига кўра, 22 декабрь куни минтақада камида 10 та V-22 Osprey конвертоплани ҳамда C-17 юк ташувчи самолётлар пайдо бўлган. Нашр суҳбатдошларидан бирининг айтишича, ушбу самолётлар орқали ҳарбий хизматчилар ва ускуналар олиб келинган. Бироқ қайси турдаги қўшинлар ва аниқ қандай ускуналар ташилгани номаълум.

Лотин Америкасидаги АҚШ ҳарбий амалиётлари учун жавобгар бўлган АҚШ Жанубий қўмондонлиги вакили қўшинларнинг аниқ кўчирилиши ҳақидаги саволларга жавоб беришдан бош тортган. У “ҳар қандай ҳарбий объектларда ускуна ва шахсий таркибнинг мунтазам ротацияси одатий амалиёт ҳисобланиши”ни билдирган. Оқ уй ва Пентагон ҳам изоҳ сўровларига жавоб бермаган.

АҚШ куз бошидан буён Венесуэла билан муносабатлар кескинлашгани фонида Кариб ҳавзасида қўшинларини тўплаб келмоқда. Минтақада ҳарбий кемалар флотилияси, жумладан энг замонавий “Жеральд Форд” авианосеци ва бешта эсминец, авианосец зарба гуруҳи, денгиз пиёдалари гуруҳи, қирувчи самолётлар, радиоэлектрон кураш самолётлари ҳамда қутқарув вертолётлари жойлашган.

Сўнгги бир неча ой давомида АҚШ, ўз баёнотига кўра, наркотиклар ташиш билан шуғулланадиган ва Венесуэла билан боғлиқ бўлган денгиз кемаларига зарбалар бериб келмоқда. Шунингдек, АҚШ Венесуэла билан ҳамкорлик қилаётган нефть танкерларини мусодара қилмоқда. АҚШ Президенти Дональд Трамп бир неча бор Қўшма Штатлар Венесуэла ҳудудига зарба бериши мумкинлигини истисно этмаган.

“Associated Press” агентлиги кеча, 23 декабрь куни Россия 19 декабрдан бери Венесуэладаги дипломатлар оилаларини эвакуация қилаётганини хабар қилди. РФ Ташқи ишлар вазирлиги бу маълумотни рад этмоқда.