АҚШ Германиядан қарийб 5 минг ҳарбийни олиб чиқади

АҚШ Германия ҳудудидан тахминан 5 минг нафар ҳарбий хизматчисини олиб чиқишни режалаштирмоқда. Бу ҳақда CBS News, “Reuters” ҳамда “Fox News” журналисти Жакие Ҳеинрич хабар берди.

Пентагон вакили Сеан Парнеллнинг сўзларига кўра, қарор Европадаги кучлар жойлашувини ҳар томонлама қайта кўриб чиқиш натижасида, шунингдек операцион вазият ва эҳтиёжлардан келиб чиқиб қабул қилинган. Ҳарбийларни олиб чиқиш жараёни 6 ойдан 1 йилгача давом этиши кутилмоқда.

Пентагондаги юқори лавозимли манбалар CBS News’га берган маълумотида, бу қадам Президент Дональд Трампнинг Европа иттифоқчилари томонидан Эрон билан урушда кўрсатилган ёрдам даражасидан норози эканига ишора сифатида баҳоланмоқда.

Маълумотларга кўра, 2025 йил декабрь ҳолатига Германиядаги ҳарбий базаларда 36 мингдан ортиқ америкалик ҳарбий жойлашган. Бундан ташқари, мамлакатда қарийб 1,5 минг нафар захира ҳарбий ва 11,5 мингга яқин фуқаролик ходимлари ҳам бор.

Эслатиб ўтамиз, жорий йилнинг 30 апрель куни Трамп Германиядаги ҳарбий контингентни қисқартириш эҳтимоли кўриб чиқилаётганини билдирган эди. Бу баёнот Германия канцлерининг АҚШ сиёсатини танқид қилганидан кейин янгради. У Вашингтонни Эрон билан урушдан чиқиш стратегиясига эга эмасликда айблаган.

Бунга жавобан Трамп канцлерни вазиятни тушунмасликда айблаб, унга Украинадаги можарони ҳал қилишга кўпроқ эътибор қаратишни тавсия қилган.