АҚШ Эронга зарба беришга тайёр – ОАВ

АҚШ ҳарбийлари 21 февраль куни Эронга зарба беришга тайёр, бироқ АҚШ Президенти Дональд Трамп ҳали якуний қарор қабул қилмаган. Бу ҳақда CBS News телеканали хабар берди.

Хабарда айтилишича, Оқ уйда вазият бўйича “динамик ва узлуксиз” муҳокамалар олиб борилмоқда. Маъмурият эҳтимолий кескинлашув хавфи, шунингдек, зарба бериш ёки тийилишнинг сиёсий ва ҳарбий оқибатларини баҳоламоқда.

Кейинги уч кун ичида Пентагон Яқин Шарқдаги ҳарбий контингентининг бир қисмини вақтинча Европага ёки АҚШга қайтармоқда. Манбаларга кўра, бу эҳтимолий ҳарбий амалиётга тайёргарлик белгиси бўлиши мумкин, аммо операция муқаррар дегани эмас.

Оқ уй матбуот котиби Керолайн Ливитт брифингда Эронга зарба бериш учун “кўплаб сабаб ва асослар” мавжудлигини, бироқ дипломатия ҳар доим президентнинг биринчи танлови эканини таъкидлаган. У 2025 йил июнь ойида Эроннинг ядро объектларига қарши ўтказилган “жуда муваффақиятли операция”ни эслатган ва Теҳрон учун Трамп маъмурияти билан келишувга эришиш оқилона йўл бўлишини айтган.

Қайд этиш жоиз, 17 февраль куни Женевада АҚШ ва Эрон ўртасидаги музокараларнинг навбатдаги босқичи якунланганди. АҚШ вакиллари Вашингтон Теҳрон учун “қизил чизиқлар”ни белгилаганини, хусусан, Эрон ядро қуролига эга бўлмаслиги кераклигини айтди.

Эрон Ташқи ишлар вазири Аббос Ароқчи эса мамлакат ядро қуролига эга бўлишга интилмаётганини билдирган.

Эслатиб ўтамиз, АҚШ сўнгги 24 соат ичида Яқин Шарққа, Эрон йўналишига 50 дан ортиқ қирувчи самолётларни жойлаштирганди. Юборилган самолётлар орасида F-35 Lightning II, F-22 Raptor ва F-16 Fighting Falcon туридаги қирувчилар бор.