АҚШ Эронга қарши кетма-кет ўнинчи кун зарбалар берди (видео)

АҚШ ҳарбийлари Эрон ҳудудига навбатдаги зарбаларни якунлаганини маълум қилди. Унда Эроннинг ҳарбий қўмондонлик марказлари, ракета ва дронлар учириш майдончалари, денгиздаги ҳарбий имкониятлари ҳамда ҳаво ҳужумидан мудофаа тизимлари нишонга олинган. Бу ҳақда бугун, 21 июль куни АҚШ Марказий қўмондонлиги (CENTCOM) маълум қилди.

Қўмондонликнинг X ижтимоий тармоғидаги баёнотига кўра, сўнгги ҳужумлар тахминан беш соат давом этган. Шу билан АҚШнинг Эронга қарши зарбалари кетма-кет ўнинчи тун давом этган.

Вашингтон бу операциялардан мақсад “Эроннинг Ҳормуз бўғози орқали ҳаракатланаётган тижорат кемаларига ҳужум қилиш имкониятларини заифлаштириш” эканини билдирган. Маълумотларга кўра, дам олиш кунлари АҚШнинг урушда ҳалок бўлган ҳарбийлари сони 17 нафарга етган. 

Кеча, 20 июль куни АҚШ Президенти Дональд Трамп дам олиш кунларида америкалик ҳарбийлар ҳалок бўлганидан кейин Эрондан қасос олишга ваъда берган. Сўнгги бир ҳафта ичида Трамп Эронда нишонга олинаётган объектлар рўйхатини энергетика иншоотлари ва кўприклар ҳисобига кенгайтириш билан таҳдид қилиб келди. 

Маълумот ўрнида, 1949 йилги Женева конвенциялари уруш пайтида аҳолининг ҳаёти учун муҳим ҳисобланган фуқаролик объектларига ҳужум қилишни тақиқлайди. Халқаро ҳуқуқ бўйича америкалик экспертлар Трампнинг бундай объектларга зарба бериш ҳақидаги аввалги таҳдидлари халқаро ҳуқуқ нуқтаи назаридан ҳарбий жиноят сифатида баҳоланиши мумкинлигини билдирган.

Қайд этиш жоизки, уруш давомида АҚШ ва Исроилнинг Эронга, шунингдек, Исроилнинг Ливанга берган ҳужумлари оқибатида минглаб одамлар ҳалок бўлган ва миллионлаб киши ўз уйини тарк этишга мажбур бўлди. Можаро нефть нархларининг ошишига ва жаҳон молия бозорларида беқарорликка сабаб бўлди.

Эслатиб ўтамиз, аввалроқ АҚШ Эрон билан катта урушга тайёргарлик кўраётгани айтилганди.