АҚШ Эрон ракета арсеналининг учдан бир қисмини йўқ қилди – ОАВ

Америка Қўшма Штатлари можаро бошланганидан бери Эрон ракета арсеналининг фақат учдан бир қисми йўқ қилинганини ишонч билан тасдиқлай олиши мумкин. Бу ҳақда Америка разведкаси маълумотлари билан таниш бўлган манбаларига таяниб, “Reuters” хабар берди.

Нашр маълумотларига кўра, Эрон ракеталарининг қолган учдан бир қисмининг тақдири номаълумлигича қолмоқда – улар авиазарбалардан сўнг бункер ва туннеллардаги вайроналар остида қолган, шикастланган ёки йўқ қилинган бўлиши мумкин. Манбалардан бири, шунингдек, АҚШ ва Исроил зарбалари оқибатида Теҳрон ихтиёридаги дронларнинг учдан бир қисмигача йўқ қилинганини таъкидлаган.

Шу билан бирга, “Reuters” суҳбатдошлари Эрон ҳали ҳам фойдаланиш учун яроқли бўлган катта миқдордаги ракета захираларини сақлаб қолаётганини урғуламоқда. Бундан ташқари, ҳарбий ҳаракатлар якунланганидан сўнг шикастланган ёки яширилган қуролларнинг бир қисми қайта тикланиши мумкин.

Қайд этилишича, АҚШ можаро бошида Эрон ракета арсеналининг аниқ ҳажми қанча бўлганлиги ҳақидаги маълумотларни очиқламаяпти. Шу билан бирга, Исроил ҳарбий қўмондонлиги вакиллари аввалроқ Теҳрон ихтиёрида Исроил ҳудудигача етиб боришга қодир бўлган тахминан 2500 та баллистик ракета бўлиши мумкинлигини даъво қилган.

Эслатиб ўтамиз, аввалроқ АҚШ Давлат котиби Марко Рубио Францияда ўтказилган G7 давлатларининг Ташқи ишлар вазирлари саммитида Эрондаги ҳарбий операциялар Прездидент Дональд Трамп ва Оқ уй маъмуриятининг саъй-ҳаракатлари билан келгуси бир-икки ҳафта ичида якунланиши мумкинлигини айтган эди.