АҚШ Эрон билан яширин музокара ўтказди

Байден маъмурияти Теҳронда сақланаётган америкалик маҳбусларни озод қилиш ва мамлакатнинг ўсиб бораётган ядро дастурини чеклаш мақсадида Эрон билан музокараларни қайта бошлади. Бу ҳақда “Wall Street Journal” хабар берди.

“АҚШ ва Эрон расмийлари, томонлар ўртасидаги алоқалар қайта тикланганидан сўнг Вашингтон Ироқ ҳукуматининг Эрон электр энергияси ва гази импорти учун 2,5 миллиард евро тўлашини маъқуллаган. Бу пуллар АҚШнинг иқтисодий санкциялари туфайли олдин музлатиб қўйилган”, деб ёзади газета.

АҚШнинг мулоқотга киришиши Эрон уранни бойитишда муваффақият қозонгани ва Форс кўрфазидаги баъзи нефть танкерларини тутиб олгани ҳақидаги хабардан кейин кучайган кескинликни юмшатишга қаратилган.

Шунингдек, нашрнинг таъкидлашича, АҚШ Президенти маъмурияти Эрон билан музокаралар олиб бораётганини яширишга ҳаракат қилмоқда. Чунки бу чоралар АҚШда президентлик сайловлари яқинлашаётган ҳамда республикачилар ва Конгрессдаги баъзи демократлар Эрон келишувига қарши чиқаётган бир пайтда жуда муҳим деб ҳисобланади.

2018 йилда АҚШ санкцияларни қайта жорий қилганидан бери Эрон ўзининг ядровий фаолиятини кенгайтирди ва икки йилдан ортиқ вақт давомида 60% бойитилган уранни тўплади. Эронда камида иккита ядро қуроли учун етарли 60% материаллар мавжуд ва уни бир неча кун ичида қурол даражасида бойитилган уранга айлантира олади, дейди АҚШ расмийлари.

Агар ёзда кескинликлар совиса, бу кенгроқ музокараларга, ҳатто, 2015 йилги ядровий келишув бўйича мунозаралар қайта тикланишига олиб келиши мумкин.

Эслатиб ўтамиз, аввалроқ Эрон ўзининг 1400 километр масофани босиб ўтиш ва барча мудофаа қобиқларини ёриб ўтиш имкониятига эга “Фаттоҳ” номли биринчи гипертовушли баллистик ракетасини намойиш қилган эди. 

Шунингдек, Эрон “Хорамшаҳр 4” баллистик ракетасининг такомиллаштирилган версияси бўлган, оғирлиги 1500 килограммни ташкил этадиган ва 2000 км масофага учишга мўлжалланган янги “Хайбар” баллистик ракетасини синовдан ўтказганди.

Иброҳимжон Ғаффоров