АҚШ энди Куба билан шуғулланади – Рубио

АҚШ Давлат котиби Марко Рубио Вашингтон келажакда Куба масаласига алоҳида эътибор қаратишини маълум қилди. Бу ҳақда у кеча, 5 май куни Оқ уйда ўтган матбуот анжуманида сўз очди.

Унинг айтишича, Кубанинг ҳозирги иқтисодий тизими ишламаяпти ва мамлакат раҳбарияти бу муаммоларни ҳал қила олмаяпти.

“Бизнинг қирғоғимиздан атиги 140 км узоқликда муаммоли давлат бор. У яна бизнинг рақибларимиз учун қулай ҳудудга айланган. Бу ҳолатни қабул қилиб бўлмайди. Биз бу билан шуғулланамиз, лекин ҳозир эмас”, деган Рубио.

Рубио Кубага нисбатан айнан қандай чоралар кўришини очиқламаган, аммо у ерда ҳам Эрон сценарийси такрорланиши мумкин.

Эслатиб ўтамиз, аввалроқ Рубио АҚШ томонидан Эрон ҳудудида ўтказилган “Эпик ғазаб” номли ҳарбий операция якунланганини маълум қилганди.

Қайд этиш жоиз, АҚШда Кубага нисбатан таҳдидли гаплар илк бор янграётгани йўқ. Жорий йилнинг 1 май куни АҚШ Президенти Дональд Трамп Флорида штатидаги тадбирда АҚШ Қуролли кучлари Эрон билан боғлиқ вазифалардан қайтгач, Куба устидан назорат ўрнатилишини айтганди. Унинг иддао қилишича, Куба ичида муаммолар мавжуд ва уларни ҳал қилиш учун АҚШ “кубаликларга қўлидан келганча ёрдам беради”.