АҚШ Босния ва Герцеговинани мағлуб этиб, 1/8 финалга йўл олди

Бугун, 2 июль куни АҚШ терма жамоаси 2026 йилги Жаҳон чемпионати 1/16 финалида Босния ва Герцеговинани 2:0 ҳисобида мағлуб этди. Натижада турнир мезбонлари нимчорак финал босқичига йўл олди.

Учрашув АҚШнинг Калифорния штати, Санта-Клара шаҳрида бўлиб ўтди. Қўшма Штатлар терма жамоаси сафида Фоларин Балогун 45-дақиқада, Малик Тилльман эса 82-дақиқада гол урди. Учрашувнинг 64-дақиқасида Балогун тўғридан-тўғри қизил карточка олди. Бош ҳакам Рафаэл Клаус қарор чиқаришдан аввал ВАР ёрдамига мурожаат қилди.

Шу тариқа, Балогун Жаҳон чемпионати плей-офф баҳсида ҳам гол урган, ҳам майдондан четлатилган тўртинчи футболчига айланди. Ундан аввал бу натижага Гарринча, Роналдиньо ва Зинедин Зидан эришган эди.

АҚШ терма жамоаси 24 йилдан сўнг илк бор Жаҳон чемпионати плей-оффининг дастлабки босқичидан муваффақиятли ўтди. Қатарда бўлиб ўтган сўнгги мундиалда америкаликлар 1/8 финалда мағлуб бўлган эди. Унгача жамоа 2018 йилги мундиалга йўлланма ололмаган, 2010 ва 2014 йилларда 1/8 финалда мағлуб бўлган, 2006 йилда гуруҳ босқичидан чиқа олмаган, 2002 йилда эса чорак финалгача етиб борган.

Босния ва Герцеговина терма жамоаси Жаҳон чемпионатида иккинчи марта қатнашди ва ўз тарихида илк бор плей-офф босқичига чиқди. 2014 йил Бразилияда ўтган мундиалда боснияликлар гуруҳ босқичини учинчи ўринда якунлаган эди.

Энди АҚШ терма жамоаси 1/8 финалда Сенегални мағлуб этган Бельгия миллий жамоасига қарши майдонга тушади. Ушбу учрашув жорий йилнинг 7 июль куни Сиэтл шаҳрида бўлиб ўтади.