АҚШ ҳам Туркиянинг ЕИга қўшилишини қўллади

Америка Қўшма Штатлари Туркияга Европа Иттифоқининг тўлиқ аъзоси мақомини беришни қўллаб-қувватлайди. Бу ҳақда Оқ уй Миллий хавфсизлик кенгаши маълум қилди.

“АҚШ ҳар доим Анқаранинг Европа Иттифоқига аъзо бўлиш борасидаги саъй-ҳаракатларини қўллаб-қувватлаган ва бунда давом этмоқда”, дейилади Оқ уй муносабатида.

Шу билан бирга, Миллий хавфсизлик кенгаши Анқарани ҳамжамиятга қабул қилиш масаласи Туркия ва ЕИ давлатлари ўртасида ҳал қилиниши кераклигини айтган.

"Бугунги кунда бизнинг эътиборимиз НАТОга аъзо бўлишга тайёр бўлган Швецияга қаратилган", дейди Оқ уй.

Эслатиб ўтамиз, олдинроқ Туркия Президенти Ражаб Тойиб Эрдўған Европа Иттифоқи Туркияни ЕИга тўлақонли аъзо қилиш учун ҳаракат қилса, Анқара Швециянинг НАТОга киришини қўллаб-қувватлашини айтганди. Шундан сўнг НАТО Бош котиби Йенс Столтенберг Шимолий Атлантика альянси Туркиянинг Европа Иттифоқига аъзо бўлишга интилишини қўллаб-қувватлашини билдирди.