Афсонавий футболчи Диего Марадона вафот этди

Аргентиналик афсонавий футболчи Диего Марадона бугун, 25 ноябрь куни 60 ёшида вафот этди. Бу ҳақда “Clarin” хабар берди.

“Наполи” ва Аргентина терма жамоасининг собиқ ўйинчиси юрак тўхташидан вафот этган.

11 ноябрь куни Марадона шифохонадан чиққанди. Собиқ футболчи субдурал гематома сабаб операция ўтказганди. Операциядан кейин эса Марадона алкоголга боғлиқликдан даволаниш учун клиникага ётқизилган.

Диего сўнгги бор 30 октябрда Аргентина чемпионатида иштирок этаётган жамоаси “Химнасия и Эсгрима”нинг “Патронато”га қарши ўйинида оммага кўриниш берган.

Кейинроқ у Ла-Платедаг Ипенса шифохонасига ётқизилгани маълум бўлганди.

Маълумот учун, Диего Марадона "Барселона", "Наполи", "Снвилья" сафида тўп сурган. 1977-1994 йилларда Аргентина терма жамоасида ўйнаган ва 1986 йилда жаҳон чемпиони бўлган. 1990 йилда эса Жаҳон чемпионатида иккинчи ўринни қўлга киритган. FIFA сайтидаги овоз бериш натижасига кўра, XX асрнинг энг яхши ўйинчиси деб топилган.