Абдумалик Халоков WBC камари учун жанг қилади

Париж-2024 Олимпиадаси ғолиби ва профбоксда ҳам муваффақиятли фаолият олиб бораётган ўзбекистонлик боксчи Абдумалик Халоков Бутунжаҳон бокс уюшмаси (WBC) ва Саудия Арабистонининг “Riyadh Season” ташкилоти томонидан ҳамкорликда ўтказиладиган бокс турнирида рингга кўтарилади. Бу ҳақда боксчининг ўзи Instagram саҳифасида маълум қилди.

“WBC турнирида қатнашаман. 5 та жанг камар учун бўлиб ўтади. Камарни Ўзбекистонга олиб келишга ҳаракат қиламан”, деб ёзди Халоков.

Маълум бўлишича, Халоков қатнашадиган турнирда профбоксда ҳали 10 та жанг ўтказмаган чарм қўлқоп усталари иштирок этади. Мусобақа 4 та вазнда ўтказилади, баҳслар 1/16 финалдан бошланади. Финалгача жанглар 6 раунд, ҳал қилувчи беллашувлар эса 8 раунддан ўтказилади. 

Февраль ойи охирида 25 ёшли Халоков Испаниянинг Севиля шаҳрида рингга кўтарилиб, венесуэлалик Марлемброн Акуньядан устун келганди. Ярим енгил вазн тоифасида фаолият олиб борувчи Ўзбекистон вакили рақибини 6 раундлик жангнинг 3-раундидаёқ рақибини техник нокаутга учратди.

Маълумот учун, ҳаваскор боксда жаҳон ва Олимпиада чемпиони ҳисобланган Халоков ҳозиргача профбоксда 2 та жанг ўтказиб, ҳар икки жангда ғалаба қозонган.