Абдулазиз Комилов Европа кенгаши раҳбарияти билан учрашди

Ўзбекистон Президентининг ташқи сиёсат масалалари бўйича махсус вакили Абдулазиз Комилов бошчилигидаги делегацияси Брюсселда Европа кенгаши раҳбарияти билан учрашди. Бу ҳақда ЎзА хабар берди.

Абдулазиз Комилов Европа кенгаши Президенти кабинет раҳбари Педро Лурти, Иттифоқнинг ташқи ишлар ва хавфсизлик сиёсати бўйича Олий вакили Вивиан Лунелла, шунингдек, Европа иттифоқининг терроризмга қарши кураш координатори Бартян Вегтер билан учрашув ўтказди. 

Қайд этилишича, Педро Лурти билан суҳбат чоғида жорий йилнинг 3-4 апрель кунлари Самарқандда бўлиб ўтадиган "Марказий Осиё – Европа иттифоқи" саммити доирасида минтақалараро ҳамкорликни янада ривожлантириш истиқболлари кўриб чиқилган.

“Дунё” ахборот агентлигининг ёзишича, Бартян Вегтер билан учрашувда терроризм ва радикаллашув таҳдидларига қарши курашиш борасидаги ҳамкорлик масалалари ҳамда Афғонистондаги вазият юзасидан фикр алмашилган. ЕИ координатори Ўзбекистон Марказий Осиёда минтақавий барқарорлик ва хавфсизликни мустаҳкамлаш, шунингдек, афғон халқининг тинч ҳаётини тиклашга кўмаклашишда муҳим роль ўйнашини таъкидлаган.

Эслатиб ўтамиз, ўтган ойда Ўзбекистон Президенти Шавкат Мирзиёевнинг тўнғич қизи – Президент ёрдамчиси Саида Мирзиёева Европа Иттифоқининг Ўзбекистон Республикасидаги элчиси Тойво Клаар билан учрашган, ва апрель ойида Самарқандда бўлиб ўтадиган “Европа Иттифоқи – Марказий Осиё” саммитига кўрилаётган икки томонлама тайёргарлик масалаларини муҳокама қилганди.