Абдулазиз Комилов Хитой Ташқи ишлар вазири билан учрашди

Жамият 1477
image

Кеча, 11 май куни Ўзбекистон Республикаси Ташқи ишлар вазири Абдулазиз Комилов Сиан шаҳрида Хитой Халқ Республикаси Давлат кенгаши аъзоси, Ташқи ишлар вазири Ван И билан учрашди. Бу ҳақда Ўзбекистон Ташқи ишлар вазирлиги Матбуот хизмати хабар бермоқда.

Қайд этилишича, Хитой Ташқи ишлар вазири Хитой Халқ Республикаси Раиси Си Сзинпиннинг Ўзбекистон Республикаси Президенти Шавкат Мирзиёевга йўллаган илиқ саломлари ва чуқур ҳурматини етказган.

Музокаралар чоғида Ўзбекистон ва Хитой ўртасидаги ҳар томонлама стратегик шерикликнинг ҳозирги ҳолати ва уни ривожлантириш истиқболлари муҳокама қилинган.

“Вазирлар олий даражада эришилган келишувларни амалга ошириш, турли йўналишдаги ўзаро муносабатларни янада кенгайтириш борасидаги икки давлат етакчиларининг топшириқларини бажариш бўйича фикр алмашди”, дейилади хабарда.

Томонлар биргаликдаги саъй-ҳаракатлар натижасида иқтисодиёт соҳасидаги ҳамкорликнинг жадал ривожланишини таъминлашга эришилганлигини мамнуният билан эътироф этган ҳамда ўзаро савдо ҳажмлари ва номенклатурасини янада оширишнинг муҳимлигини таъкидлаган.

Шунингдек, “Хитой – Қирғизистон – Ўзбекистон” мультимодал транспорт маршрутини ривожлантириш ва “Хитой – Қирғизистон – Ўзбекистон” темир йўлини қуриш лойиҳасини биргаликда ҳаётга татбиқ қилиш бўйича тезроқ амалий чоралар кўришнинг долзарблиги қайд этилган.

Вазирлар халқаро ва минтақавий ташкилотлар доирасидаги ҳамкорлик, минтақавий хавфсизликни таъминлаш, Афғонистонда мустаҳкам тинчликка эришишга ва унинг иқтисодиётини тиклашга кўмаклашиш механизмларига алоҳида эътибор қаратган.

Эслатиб ўтамиз, Абдулазиз Комилов Хитойга “Хитой – Марказий Осиё” иккинчи вазирлар учрашувида иштирок этиш учун ташриф буюрди. Мазкур тадбирда, шунингдек, Хитой Халқ Республикаси, Қирғиз Республикаси, Қозоғистон Республикаси, Тожикистон Республикаси ва Туркманистон ташқи сиёсат идоралари раҳбарлари ҳам қатнашмоқда.

Умиджон Нозимжонов
Мақолага баҳо беринг
Баҳолаганлар: 11
Рейтинг: 3.2
t
×