Аббос Италияга кетадими? – Спорт дайжести

“Рома”нинг ажралмас қисмига айланиб улгурган Элдор Шомуродов мураббийсиз қоладиган бўлди. Ўзбек футболининг ёрқин феномени ҳисобланган Аббосбек Файзуллаев Шомуродов ортидан Италияга кетиши мумкин. Европада мавсум якунламоқда, аммо Италия чемпионатида яхшигина интрига мавжуд. Ҳафта спортининг муҳим воқеалари билан QALAMPIR’да спорт дайжести.

Файзуллаев ёзда Италияга кетади – манба

Ўзбекистон миллий терма жамоаси ва Россиянинг ЦСКА клуби ярим ҳимоячиси Аббосбек Файзуллаев фаолиятини Италия А Сериясида давом эттириши мумкин. Бу ҳақда QALAMPIR.UZ манбаси хабар берди.

Манбага кўра, жорий мавсум якунидан сўнг Аббосбек Файзуллаев ҳозирги жамоасини тарк этиб, Италия клубига йўл олиши мумкин. Ҳозирда ушбу мамлакатнинг бир нечта жамоаларидан таклифлар бор ва улар ўрганиб чиқилмоқда. Бироқ мазкур жамоалар номи ошкор қилинмади.

Маълумот учун, Аббосбекнинг ЦСКА билан тузган шартномаси келаси йилнинг ёзида якунланади. 21 ёшли футболчи жорий мавсум 37 та учрашувда майдонга тушди. Унинг ҳисобида 3 та гол ва 7 та голли узатма бор. “Transfermarkt” нашри футболчини 8 миллион еврога баҳолаган. 

Ямалга “Барселона”да янги рақам берилади

Испаниянинг “Барселона” клуби футболчи Ламин Ямалга афсонавий 10-рақами топширилади. Бу ҳақда “Memorabilia1899” хабар берди.

Янги рақам футболчига 18 ёшга тўлганидан сўнг, яъни 13 июлдан кейин берилади. Ҳозирда бу рақам Ансу Фати номига расмийлаштирилган. Манбага кўра, Ямалга 10-рақам топширилиши Фати клубда қолиш ёки қолмаслигидан қатъи назар амалга оширилади.

Клуб раҳбарияти бу қарор савдо ҳажми, айниқса атрибутика сотувини оширади деган умидда. Бунгача испан нашрлари “Барселона” Ямаль билан маош оширишни назарда тутувчи янги узоқ муддатли шартнома устида ишлаётгани ҳақида хабар берган.

Маълумот учун, клуб тарихида 10-рақамга Лионель Месси, Диего Марадона, Роналдиньо, Ривалдо, Ромарио каби футбол афсоналари ҳам эгалик қилган.

Ламин Ямаль 2023 йилдан бери “Барселона” сафида тўп сурмоқда. Шу вақт ичида у икки карра Испания чемпиони бўлди, мамлакат Кубоги, Суперкубогини қўлга киритди ва Испания терма жамоаси таркибида 2024 йилги Европа чемпионлигини нишонлади. Жорий мавсумда Ямал клуб ва терма жамоа сафида жами 59 ўйинда майдонга тушиб, 19 та гол урди.

“Олтин тўп” мукофотининг қачон ва қаерда берилиши маълум бўлди

Йилнинг энг яхши футболчисига топшириладиган  “Олтин тўп” (“Ballon d’Or”) мукофоти маросими жорий йилнинг 22 сентябрь куни Франциянинг Париж шаҳридаги “Шатле” театрида бўлиб ўтади. Бу ҳақда мукофотнинг расмий саҳифаси орқали эълон қилинди.

Қайд этилишича, номзодлар рўйхати 6 август куни эълон қилинади.

Маълумот учун, мазкур мукофот илк бор 1956 йилда “France Football” журнали бош муҳаррири Габриэль Ано ташаббуси билан таъсис этилган. Аввалига мукофот фақат Европа футболчиларига берилган, 1995 йилдан бошлаб эса Европа клубларида тўп сураётган ҳар қандай миллат вакили уни қўлга киритиши мумкин бўлган. 2007 йилдан эса “Олтин тўп” исталган жаҳон футболчисига берилиши мумкин.

Эслатиб ўтамиз, ўтган йили “Олтин тўп” мукофотига Испания терма жамоаси ва “Манчестер Сити” клуби ярим ҳимоячиси Родри сазовор бўлган эди. У 2023/24-йилги мавсумда Европа чемпиони бўлиш билан бирга, мусобақанинг энг яхши футболчиси деб топилган. Шунингдек, у “Манчестер Сити” билан Англия чемпионлигини ҳам қўлга киритган эди.

“Рома” ва “Шома” “Милан”ни мағлуб этди

Кеча, 18 май куни “Рома” Италия А Сериясининг 37-тури доирасида ўз майдонида “Милан” устидан ишончли ғалабага эришди. Ўзбекистон миллий терма жамоаси ҳужумчиси Элдор Шомуродов мазкур баҳсда 84 дақиқа ҳаракат қилди.

Учрашув Римдаги “Олимпико” стадионида бўлиб ўтди ва 3:1 ҳисобида “Рома” фойдасига якунланди. Ҳисоб учинчи дақиқада римликлар ҳимоячиси Жанлука Манчини томонидан очилди. 39-дақиқада “Милан” ҳужумчиси Жоау Феликс ҳисобни тенглаштирди. Бироқ 58-дақиқада ярим ҳимоячи Леандро Паредес “Рома”ни яна олдинга олиб чиқди, 87-дақиқада эса Брайн Кристанте ҳисобни 3:1 кўринишига келтирди.

Қайд этиш жоиз, “Милан” 21-дақиқадан бошлаб бир ўйинчи кам бўлиб ҳаракат қилди – Сантьяго Хименес қизил карточка олиб, майдонни тарк этди.

Мазкур ғалабадан сўнг “Рома” очколарини 66 тага етказиб, турнир жадвалининг 5-поғонасида бормоқда. “Милан” эса 60 очко билан 9-ўринда жойлашган. Бу Рим клуби устози Клаудио Раньерининг жамоа бошқарувида ўтказган сўнгги уй ўйини бўлди. У мавсум тугаганидан сўнг мураббийлик фаолиятини якунлайди.

Кичик Криштиану илк совринини қўлга киритди

Беш карра “Олтин тўп” соҳиби Криштиану Роналдунинг ўғли кичик Криштиану Роналду Португалия терма жамоаси сафида илк совринини қўлга киритди. Унинг соврин билан тушган сурати Х’даги TCR саҳифасида эълон қилинди.

14 ёшли футболчи яқинда илк бор Португалиянинг 15 ёшгача бўлган ўсмирлар терма жамоасига чақирув олди. Улар халқаро турнир финалида Хорватия билан тўқнаш келди ва учрашув португалияликларнинг 3:2 ҳисобидаги ғалабаси билан якунланди. Кичик Роналду ўйиннинг 13- ва 44-дақиқаларида гол уриб, жамоасининг ғалабасига муҳим ҳисса қўшди.

Бу голлар кичик Роналду учун халқаро миқёсдаги илк голлар бўлди ва у атиги бир неча кун аввал терма жамоадаги дебютини нишонлаганди. Гуруҳ босқичидаги Япония устидан 4:1 ҳисобида қозонилган ғалабада у 54-дақиқада захирадан майдонга туширилган.

Мазкур ўйиндан сўнг отаси Криштиану Роналду Instagram саҳифасида ўғлини табриклади.

“Португалия сафидаги дебютинг билан табриклайман, ўғлим. Мен сен билан жуда фахрланаман!” деб ёзди у.

Тарихдаги энг яхши футболчилар эълон қилинди

Халқаро футбол тарихи ва статистикаси федерацияси (IFFHS) аргентиналик ҳужумчи Лионель Мессини барча даврларнинг энг яхши футболчиси деб эътироф этди. Бу ҳақда федерация томонидан тузилган рейтингда келтирилган.

Рейтингда иккинчи ўринни бразилиялик афсона Пеле эгаллади, учинчи поғонага яна бир аргентиналик футболчи Диего Марадона жойлаштирилди.

Мессининг энг ашаддий рақобатчиси, футбол тарихидаги расмий ўйинларда энг кўп гол урган португалиялик ҳужумчи Криштиану Роналду бу рўйхатда тўртинчи ўриндан жой олди.

Шунингдек, кучли ўнликдан қуйидаги футболчилар ҳам ўрин олди:

Йохан Кройфф (Нидерландия) – 5-ўрин;
Роналдо (Бразилия) – 6-ўрин;
Зинедин Зидан (Франция) – 7-ўрин;
Франц Беккенбауэр (Германия) – 8-ўрин;
Альфредо Ди Стефано (Аргентина/Колумбия/Испания) – 9-ўрин;
Роналдиньо (Бразилия) – 10-ўрин.
Шу билан бирга, СССР терма жамоаси ва Москванинг “Динамо” клубининг собиқ дарвозабони Лев Яшин IFFHS талқинига кўра барча даврларнинг энг яхши дарвозабони деб эълон қилинди.

IFFHS тузган рейтингда иккинчи ўринни италиялик Жанлуижи Буффон, учинчи ўринни эса германиялик Мануэль Нойер эгаллади.

Кучли ўнликдан шунингдек, испанлар Икер Касильяс (4-ўрин) ва Рикардо Самора (9), инглиз дарвозабони Гордон Бэнкс (5), чех Петр Чех (6), италиялик Дино Дзофф (7), немис дарвозабонлари Зепп Майер (8) ва Оливер Кан (10) ҳам ўрин олди.

Маълумот учун, Лев Яшин футбол тарихида дарвозабонлар орасида “Олтин тўп” (1963 йилда) мукофотини қўлга киритган ягона футболчи саналади. FIFA томонидан у 20-асрнинг энг яхши дарвозабони сифатида ҳам тан олинган.

Яшин бутун футболчилик фаолиятини Москванинг “Динамо”сида ўтказган. У СССР терма жамоаси сафида 74 та ўйинда майдонга тушган, 1956 йилги Олимпия чемпиони ва 1960 йилги Европа чемпионати ғолиби бўлган.