9 яшар блогер отасининг 118 минг доллар пулини рекламага ишлатиб юборди

АҚШда 9 яшар бола ота-онасидан яширинча отасининг корпоратив банк картасидан фойдаланиб, Minecraft ва Roblox ҳақидаги видеоларини реклама қилишга 118 минг доллар сарфлагани маълум бўлди. Бу ҳақда “pravilamag” хабар берди.

Қайд этилишича, Майк исмли мактаб ўқувчиси компьютер ўйинларини ўйнаётгани акс этган видеоларни YouTube’га жойлаб келган. Унинг Mighty Mike Plays каналида 35 мингдан ортиқ обуначи бор.

Жорий йилнинг 15 сентябрь куни каналга навбатдаги ўйин жараёни акс этган видео жойланган. Бироқ бу сафар видеони Майкнинг ўзи эмас, отаси Дэйв овозлаштирган. У ўғли ундан яширинча қиммат реклама кампанияларини ўтказганини айтган.

Отаси дастлаб ўғлининг каналини қўллаб-қувватлаш мақсадида унга 20 долларлик реклама кампаниясини ташкил қилиб берган. Майк реклама воситаларидан қандай фойдаланишни ўрганиб олгач, уларни мустақил равишда ишлата бошлаган. Бола реклама харажатлари учун отасининг Google аккаунтига уланган корпоратив банк картасидан фойдаланган.

Ҳодиса отаси ишхонада корпоратив карта бўйича масъуллар билан суҳбатга чақирилганида фош бўлган. Дэйв ўша ерда картасидан 100 минг доллардан ортиқ маблағ ечилганини билган. Транзакцияларни кўриб, пуллар ўғлининг YouTube каналидаги рекламаларга сарфланганини тушунган.

Дэйвнинг айтишича, 9 яшар бола бундай катта харажатларнинг аҳамиятини тўлиқ англамаган. У, шунингдек, молиявий маълумотларга чекловсиз кириш имконини бергани учун жавобгарликни ўз зиммасига олган.

Ҳозирда оила картадаги сақланган тўлов маълумотларини ўчириш, харажатларга лимит ўрнатиш ва ота-она назоратини йўлга қўйишни режалаштирмоқда. Оиладаги муҳокамалар якунига қадар боланинг YouTube канали фаолияти ҳам тўхтатилади.