50 000 уй қурилиши: Ким Чен Иннинг шахсий лойиҳаси якунланди

Шимолий Корея Пхеньянда 50 000 та тураржой қурилиши якунлади. Лойиҳанинг асосий мақсади уй етишмовчилигини бартараф этиш ва аҳолининг турмуш даражасини оширишдир. Бу лойиҳа етакчи Ким Чен Иннинг шахсий ташаббуси бўлиб, 2021 йилда Халқ ишчилари партияси конгрессида жорий этилган. Бу ҳақда “Yonhap” ахборот агентлиги хабар берди.

Умумий қурилишнинг 40 000 таси Сонгсин ва Сонгҳва туманларида 2022 йилда, Ҳвасонг туманида эса 2023–2025 йилларда амалга оширилган. Қолган 10 000 уй яқинда фойдаланишга топширилган. Ким Чен Ин лойиҳанинг очилиш маросимида қизи Ким Чжу Э билан қатнашган.

Раҳбар Пхеньянда янада “катта қурилиш лойиҳаси” бошланишини маълум қилган ва навбатдаги, 9-конгрессда “муайян ютуқлар” ҳақида эълон қилинишини айтган.

Экспертлар назарида ушбу лойиҳа партия конгрессидан олдин якунланиб, Пхеньяндаги қурилиш ишлари режимнинг асосий сиёсий ютуқлари сифатида кенг тарғиб қилинади ва халқ қўллаб-қувватлашига туртки бўлади.

Эслатиб ўтамиз, жорий йилнинг 15 февраль куни Ким Чен Ин Россия–Украина уруши пайтида ҳалок бўлган шимолий кореялик аскарлар оилалари учун Пхеньянда қурилган янги уйларнинг очилиш маросимида иштирок этган эди.