2 кишининг қотилига оғир депрессия учун компенсация тўланди

Буюк Британияда 2 кишини ўлдирган ва қамоқхона ходимини гаровга олган маҳбус суд харажатларини ҳам қўшган ҳолда 240 минг фунт стерлинг миқдорида компенсация олди. Бу ҳақда “Mirror” хабар берди.

Нашрнинг ёзишича, 36 ёшли Фуад Авале 2013 йилда гиёҳвандлик билан боғлиқ можаро вақтида икки нафар ўсмирни отиб ўлдиргани учун умрбод қамоқ жазосига ҳукм қилинган. Ўша йили у қамоқхона ходимини ўлдириш билан таҳдид қилгани учун яна олти йилга озодликдан маҳрум этилган. Авале ўткир тиғли буюмни ходимнинг томоғига тираб, “қаршиликни бас қил, мен икки кишини ўлдирганман, сени ҳам ўлдираман”, деган.

Авале экстремистик қарашларда айбланиб, қатъий назорат марказига жойлаштирилганидан сўнг ўзида “оғир депрессия” бошланганини билдириб, судга мурожаат қилган. Бу марказда маҳбуслар тўрт нафаргача ходим томонидан видеокамералар орқали кузатилади. Кейинчалик Авале Вудхилл ахлоқ тузатиш колониясига жойлаштирилган ва 2021 йилдан 2023 йил 17 мартгача бошқа маҳбуслар билан умуман мулоқот қилмаган. У кунига атиги бир соат камерадан ташқарида бўлиш имконига эга бўлган.

Олий суд Авалени изоляцияда сақлаш Европа инсон ҳуқуқлари конвенциясининг 8-моддасини бузган деган хулосага келиб, унга 7 500 фунт стерлинг миқдорида компенсация ҳамда 234 минг фунт стерлинг суд харажатларини қоплаб беришни белгилаган.

“Солиқ тўловчилар бу одамга 7 500 фунт стерлинг компенсация тўлаб, 230 минг фунтдан ортиқ юридик харажатларини ҳам қоплаши – бемаъни ҳазилдир. У икки кишини ўлдирган ва қамоқхона ходимини гаровга олган экстремист. Европа инсон ҳуқуқлари суди амалда террорчиларнинг бошқа экстремистлар билан мулоқот қилиш “ҳуқуқи”ни қамоқхона ходимларининг хавфсизлигидан устун қўймоқда”, дейди соя ҳукуматдаги Адлия вазири Роберт Женрик.

Компенсация тўланганига оид тафсилотлар яқинда, Женрик Адлия вазири Дэвид Лэммидан мактуб олганидан кейин маълум бўлган.