112 ягона диспетчерлик хизмати ташкил этилади
Жамият
−
30 Май
5417Эндиликда Ўзбекистонда ҳодиса ва фавқулодда вазиятлар рўй берганда шошилинч ёрдам кўрсатиш учун 112 қисқа рақам орқали фуқароларнинг чақирувларини қабул қилиш ва автоматлаштирилган тарзда қайта ишлаш имконини берувчи ягона диспетчерлик хизмати ташкил этилади. Бу ҳақдаги тегишли ҳукумат қарори кеча, 29 май куни қабул қилинди.
112 ягона диспетчерлик хизмати Ички ишлар вазирлиги, Фавқулодда вазиятлар вазирлиги, Соғлиқни сақлаш вазирлиги, Ўзбекистон Республикаси Президенти ҳузуридаги Ижтимоий ҳимоя миллий агентлиги ҳамда “Ҳудудгазтаъминот” акциядорлик жамиятининг шошилинч хизматларини маълумотларни узатишнинг ягона тармоғига бирлаштирган ҳолда республиканинг барча ҳудудлари бўйича шошилинч ёрдам чақириқларини қабул қилиш ва қайта ишлаш, аҳолига шошилинч ёрдам кўрсатиш фаолиятини бошқаришнинг ягона тизими ҳисобланади.
Қарорга кўра, қуйидагилар 112 ягона диспетчерлик хизматининг асосий вазифалари этиб белгиланди:
- фуқароларнинг чақирувларини қабул қилиш ва автоматлаштирилган тарзда қайта ишлаш, уларга бепул асосда шошилинч, тез ва кечиктириб бўлмайдиган ёрдамни ташкил этиш ва кўрсатиш;
- шошилинч ёрдам кўрсатишни бошқариш ва мувофиқлаштириш;
- вазирлик ва идораларнинг шошилинч хизматлари томонидан фуқароларга ўз вақтида ёрдам кўрсатилиши юзасидан тизимли назорат юритиш;
- вазирлик ва идораларнинг шошилинч хизматлари ўртасида яқиндан ахборот алмашинуви бўйича тезкор ўзаро ҳамкорликни таъминлаш.
112 ягона диспетчерлик хизмати қуйидаги муддатларда босқичма-босқич ишга туширилади:
- 2024 йил 1 июндан Тошкент шаҳри ва Тошкент вилоятида;
- 2024 йил биринчи ярим йиллигида Андижон, Наманган ва Фарғона вилоятларида;
- 2024 йил якунига қадар Қорақалпоғистон Республикаси ва қолган вилоятларда.
LiveБарчаси