Тошкент вилоятида ҳайдовчи пиёданинг ўлимига сабабчи бўлди

Жорий йилнинг 17 апрель куни Тошкент вилоятида юз берган йўл-транспорт ҳодисаси натижасида 33 ёшли пиёда ҳалок бўлди. Бу ҳақда ИИВ ҳузуридаги Тергов департаменти маълум қилди.

ЙТҲ соат 17 апрель куни 23:50 ларда Зангиота тумани “Туркистон” маҳалласидан ўтган М-39 йўлида юз берган. Номаълум ҳайдовчи, терговга қадар текширув давомида номаълум автомашинасида Тошкент томон ҳаракатланиб кетаётганда М-39 йўли 818-километри автомобиль қатнов қисмида 33 ёшли фуқаро В.Р.ни уриб юбориб, ҳодиса жойидан яширинган.

Ушбу йўл-транспорт ҳодисаси оқибатида пиёда В.Р. ҳодиса бўлган жойида вафот этган.

Ҳолат юзасидан номаълум шахсга нисбатан Зангиота тумани ИИБ ҳузуридаги Тергов бўлими томонидан Ўзбекистон Республикаси Жиноят кодексининг 266-моддаси 2-қисми (Транспорт воситалари ҳаракати ёки улардан фойдаланиш хавфсизлиги қоидаларини бузиш) ва 117-моддаси 2-қисми (Хавф остида қолдириш) билан жиноят иши қўзғатилган.

Дастлабки тергов жараёнида олиб борилган тергов-тезкор ҳаракатлари натижасида ушбу йўл-транспорт ҳодисасини Тошкент шаҳар Юнусобод туманида яшовчи 26 ёшли А.Ш., бошқарувидаги Nexia русумли автомашинасида содир этганлиги аниқланиб процессуал тартибда ушланган.